Grønlandsbankimi sinneqartoorutit ikinnerupput
Angusarineqartup pitsaannginneranut pissutaavoq aningaasartuutit qaffassimanerat, ilaatigut sulisunut aningaasartutit qaffannerannik, aamma aningaaseriviit Amagerbankenip, Fjordbankmorsip Max Bankillu ajutoorneranik pissuteqartumik. Taakku katillutik Grønlandsbankimut 19- millionit koruuninik naleqarsimapput.
- Ajuusaarnaraluarpoq aningaasanik taama amerlatigisunik annaasaqarnerput, qujanartumilli iluarsartuusseqqinnissamut akissaqarpugut, Martin Kviesgaard, kisitsisinik naammagisimaarinnilluartoq, oqarpoq, "Grønlandsbankilu niuernermik ingerlatsiviulluartutut nunani allani aningaaserivinnut sanilliunneqarsinnasoq" oqarluni.
Ukiumut missingersuutigineqarsimasut iluarsineqalaarsimagaluartut Aningaaserivimmit isumalluarfigineqarput. Maanna naatsorsuutigineqalerpoq aningaasat nalingisa iluarsineqarnissaat, nalikilliliinerillu pitinnagit 95- aamma 115- millionit koruuniunissaat naatsorsuutigineqarpoq, ukiup siuliani 108- millionit koruuniusimallutik.