Grønlandsbankimi piginneqataassutini Nationalbankip tunivai
Danmarkimi naalagaaffiup aningaaserivissuata GrønlandsBankemik 1967-mili piginneqataalersimasup, pissusissamissorsoraa piginneqataassutini Namminersornerullutik Oqartussanut tunissagunigit. Namminersornerullutillu Oqartussat ingerlaannaq akuersigamik aningaasat 90 milliuuni koruuningajaat imaluunniit piginneqataassutit 13,33 procentit atorlugit pisiariniarpaa. Naalakkersuisut aningaaserivimmik nunatsinni angerlarsimaffeqartumik peqarnissamik kissataat tamaalilluni suli qaninnerulerpoq. Sulilumi siunissami piginneqataasutit amerlanerit piginiarnissaat naalakkersuisunngortartussat inatsisartunilu ilaasortanngortartussat isumagisariaqaraat, aningaasaqarnermut naalakkersuisoq Tuusi, Josef Motzfeldt isumaqarpoq.
Aningaaserivik arlalippassuarnit mikisuarakkuutaarlugu allanit pigineqarneranit nunatsinni pigineqaruni Tuusip pitsaanerutippaa, nunatsinnilu pigineqareeriarpat siunissami naalakkersuinermik suliallit iliuuseqarsinnaanissaat naatsorsuutigisariaqarnerarpaa. Nunatta namminersulivinnissaa aamma eqqarsaatigalugu nunatsinni angerlarsimaffeqartumik aningaaseriveqarnissaq pingaaruteqarnerarpaa, iliuuserlu maanna soqutiginarnerarlugu. Aningaasaateqarfik Nunafond taama amerlatigisunik aningaasaateqartiginngimmat piginneqataassutit aningaaerivissuup tuniniagai pisiarisinnaasimanngilai.
Aningaasaqarnermut naalakkersuisup Josef Motzfeldtip aamma oqaatigaa GrønlandsBankemi piginneqataasut sinneri tulliani sisamanngorpat qanimut suleqatigiinnerunissasaq pillugu ataatsimeeqatigissallugit. Aningaaserivimmik GrønlandsBankimik piginneqataapput Danmarkimi Danske Andelskassers Bank, aningaasaliinermik suliallit, Sparinvest kiisalu Savalimmiuni sillimasiisarfik.
