Grønlandsbanki ingerlalluarpoq
Grønlandsbankenip naatsorsuutai ilimagisamit pitsaanerusut ukiup affaani siullermi naatsorsuinermi erserpoq. Grønlandsbankip akileraarutit peernagit 2004-mi ukiup affaani siullermi 25 million koruuninit ukioq manna ukiup affaani siullermi 50 1/2 million koruuninut aningaasaatai qaffassimapput.
Iluanaarutit amerlisimapput aningaasartuutit nalikilliliinerillu apparsimallutik.
Grønlandsbankenip ilanngullugu nunatta aningaasaqarnera naatsorsorsimavaa, ukiunullu siuliinut naleqqiullugu pitsanngoriarsimasoq banki naliliivoq.
Raajanut akigitinneqartut akikitsunnguamit qaffariarsimapput. Qaleralinniarneq ajunngitsumik ingerlavoq, akigineqartut ajunngillat, saattuarniarnermili unittooqqasoqarpoq. Aningaasaqarnerup pitsannngoriarsimanerata kingunerisaanik taarsigassarserusullutik qinnuteqartartut amerlisimapput: sanaartugassat aningaasalersorneqarnissaannut atugassanik aningaasanik atorniartoqartarpoq, inuillu ataasiakkaat illutaarniarlutik amerlanerusunillu pigisassaminnik pisiniarniarlutik qinnuteqartarlutik.
Aningaaseriviit aningaasaqarneri 2005-imi akileraarutit peernagit bankip iluanaarutissaannut aalajangiisussasut Grønlandsbankenip erseqqissarpaa.