Grønlandsbanken aatsaat taama angusarissaartigisoq
Bank Nordik angusarissaartoq oqaluttuaraarput. Aammali aningaaserivik alla, tassalu Grønlandsbankeni angusarissaarpoq.
Akileraareernermi siorna ukiumut angusaq 130 milliuunit koruuniuvoq.
Tassalu aningaaserivik siorna ukiumut angusaminit akileraareerluni 113 milliunit koruuniusumit angusarissaarnerneruvoq.
Grønlandsbankenip ukiuni qulini aatsaat taama taarsigassarsititsinernera angusamut pissutaaqataavoq.
Aningaaserivimmi siorna taarsigassaqartitsinerusimavoq qularnaveeqqusiinerusimallunilu tassanilu ukiumut inernera 5,2 milliardit koruuniupput. Taakkulu 2018-imut sanilliullugit 488 millionit koruuninik amerlanerupput.
- Taarsigassaqartitsinermi aamma qularnaveeqqusiinerni tamanna ukiuni qulini aatsaat taamak annertutigaaq. Aningaasaqarnerup ingerlalluarnera, Nuummi inissianik sanaartitsineq taavalu takornariaqarnermi ineriartornermi aningaasaliinerit malunnarsiartorput, aningaaseriviup pisortaa Martin Kviesgaard oqarpoq.