Grækerit politiivi sorsunnermiit qimaasunik 38-nik siumuisimasut

Sorsunnermiit qimaasut Syriameersuugunartut 38-t qeqertaaqqami kanngissimasut ullunilu arlalissuarni tassaneeruusaarsimasunik siumuisimallutik, grækerit politiivi ippassaq ataasinngornermi nalunaarutigaat.

Qimaasullu ilaat meeraq toqusimasoq, Grækenlandimi tusagassiorfiit ilaasa oqaatigaat. Tamannali grækerit politiivinit uppernarsarneqanngilaq.

- Sukumiisumik paasiniaareerluta sorsunnermit qimaasut inuit arlallit Syriamiuunerartut nassaaraagut. Taakkunannga arnat qulingiluaapput arfineq-marlullu meeraallutik, grækerit politiivi nalunaarput.

AAMMA ATUARUK Qimaasut najugarigallagaanni 243-t coronavirusimik tunillanneqarsimasut

Tusagassiutiniillu oqaatigineqarpoq, sorsunnermit qimaasut taakku Tyrkiep avannaatungaaniittumi ulluni arlalinni qeqertaaqqamiittuarsimasut, taakkulu grækerit teqqilluunniit akisussaaffigerusussimanngikkaat.

- Tusakkagut naapertorlugit meeraq ataaseq toqusimavoq, sukkasuumillu ikiorsiisoqanngippat taakku arlallit inuunerat navianartorsiorput, FN-p qimaasunut suliniaqatigiiffia Twitterimimi ippassaq ataasinngornermi allappoq.

Grækenland oqaatiginiarneqartuartarpoq sorsunnermit qimaasunik taamatut Tyrkiep imartaanut Det Ægæiske Havip tungaannaanut utertitsiinnarnerarneqartarnera, grækerilli taamatut oqaatiginiarneqartarnertik akuersaarneq ajorpaat.