Grækenlandimi suli ikuallannersuaqarpoq
Qeqertaasami Peloponnesimi orpippassuit ikuallattorujussuupput, qatserisartullu qulimiguullillu qatserillutik ulapputeqaat. Provinsimili Grækenlandip avannarpasissuaniittumi, Kavalami, orpippassuit aamma ikuallattorsuupput.
Grækenlandimi oqartussaasut ernummatigaat ikuallannerit 2007-imi ikuallarujussuartoqarneratut siaruaannissaat, inuit 77-it taamani ajunaarput.
Grækenlandimi massakkut 35-nik kiappoq anorersuarlunilu, taamaammat Grækenlandimi sumiiffinni arlalinni inuit kalerrisaarneqarnissaminnut oqartussaasunit sillimaqquneqarput, aamma illoqarfiit pingaarnersaani, Athenimi.
Spaniami qeqertami feriartarfissuarmi nuanneqisumi, Gran Canariamiittumi, La Palmami, orpippassuit ikuallattorsuupput, ilungersunaqisumillu qatserniarneqarlutik.
Nuna 1.500 hektari ikualasorsuuvoq, inuillu 4000-init amerlanerit qimagussorneqartariaqarsimapput. Silasiortunilli nalunaarutigineqarpoq, anori ulluni tulliuttuni qasukkariartussasoq, taamaammat innerup siaruaannissaa annikinnerulissaaq.
