GPS-p VHF-llu umiatsiamik ujaasineq sivikillisarpaa
Kangilinnguani sakkutooqarfik pingasunngormat ullaakkut nalunaarfigineqarpoq, umiatsiaaraq, marlunngornermi ualikkut sisamat eqqaanni Arsummit Paamiuliarluni aallarsimasoq apuussimanngitsoq.
Sinerissamik nakkutilliissut Tulugaq taamaalinerani qanittumiittoq, Arsuup Paamiullu akornanni nunap iluatigut aqqutaatigut ujaasitinneqalerpoq.
Pingasunngormat ualikkut pingasunngulersoq Tulukkap umiatsiamik ingerlatsisoq attaveqarfigaa, umiatsiaaralu kangerluup Kuummiut qinnguaniittoq, ilaasullu tamarmik ajunngitsut nassaaralugit. Umiatsiaaraq motooriminik ajornartorsiuteqarsimavoq, Tulukkamillu kalinneqarluni Paamiunut apuunneqarluni.
Kangilinnguani sakkutooqarfiup nittartakkamini erseqqissarpaa, ujaasinerup iluatsinneranut pissutaasoq, umiatsiaaqqap GPS-eqarlunilu VHF-radioqarnera. Tassami taakkuninnga atortorissaaruteqarsimanngikkaluarpat, umiatsiaaqqap sumiinnerata paasinissaa ajornakusoornerusimassagaluarmat, Kangilinnguani sakkutooqarfik taama erseqqissaavoq.
