GPS-imik nassitsissutinnguaq takornariamik annaassivoq

Ajunaalernermi kalerrisaarutip GPS-imik nassitsissutip mikisunnguup, qularnanngitsumik takornariap angutip 30-nik ukiullip inuunera annaappaa. Taanna Kangerlussuarmit pisummik Sisimiunukartilluni, isikkamigut ajornartorsiornini pissutigalugu uniinnartariaqalersimavoq.
Allattoq Elisa Isaksen
aggustip 24-at 2012 07:50

Taama pisoqarmat ajunaalernermi kalerrisaarut mikisunnguaq toorpaa, taannalu qaammataasakkut nunani tamalaani kalerriisarfimmut Texasimi Houstonimiittumut annguppoq. Tassanilu angut sumiissusersineqarpoq, tassa Sisimiunit 32 kilometerinik kangisinnerusumiittoq, kangerluup Amerlup eqqaaniittoq paasineqarami.

Kalerriisarfimmit tassannga Nunatsinni oqartussat kalerrinneqarput.

Tamaani pujornera pissutigalugu qulimiguulimmik takuniaanissaq taamaatiinnarneqarpoq. Sisimiunili politiit, politiit angallataanik Sisak IV-mik qatserisartut ikiorsiullugit annaassiniarneq aallartippaat. Takornariaq ajunngitsoq inuunerminillu navianartorsiunngitsoq nanivaat.

GPS-ikkut nassitsissuteeraq 1.000 koruunit missaannik akilik, Nunatsinnit qaammataasakkut Houstonimut kalerriisinnaanera uppernanngingajapporluunniit.