Gorm inuusuttunut siunnersortaagaluarpoq: Maanna kiinnanut assiaqutiliorpoq
Isumassarsiaq. 3D printeri kajumissuseqarluarnerlu.
Gorm Geisler Voldip taakku pigai, taannalu nunatsinni peqqinnissaqarfinnut angerlarsimaffimminit kiinnamut assaiqutiliornissamut Nunatta nakorsaaneqarfianit akuersissuteqarfigineqarpoq.
Nunarput coronamik assersuutigalugu Danmarkitut, Savalimmiutut Islanditullu eqqugaatiginngilaq. Tunillatsissimasut Nuummi aqqanillit paasineqarnikuupput, taakkuli tamarmik peqqisseqqinnikuupput.
Tunillatsissimasunik nutaanik paasisaqartoqarani ullut 16-it ingerlareerput. Nunatsinnili tuniluuttoqalissagaluarpat peqqinnissaqarfilluunniit sulisuminut illersuutissanik amigaateqalissagaluarpat Gorm Geisler Vold kiinnamut assiaqunik pisaraiqartitsisoqalernissaanut piareersimavoq. Nunarsuarmimi tamarmi atortut issersuutaasinnaasut amigaatigineqarput.
Danskit suliutaat
Taannami 3D printerimik plastikkimik aatsitseriaruni naqqanit sanaartorsinnaasumik atorpoq. Taamaalillunilu kiinnamut assiaqutit atortussaannik sanaartorsinnaalerluni.
Gorm Geisler Voldip kiinnamut assiaqutit nutaat misilittarai.
Gorm Geisler Vold meeqqanut immikkut ikiortarialinnut siunnersortaalluni namminersortuugaluarpoq. Coronalli ajornartorsiortitsinera pissutigalugu sullittakkani naapissinnaanngilai, suliffeqarfialu ingerlalluarpallaarnani.
Danmarkimiilli kiinnanut assiaqutiliornissamut soqutiginninnersoq aperineqarpoq. Danmarkimimi eqimattat danskit peqqinnissaqarfiinut kiinnanut assiaqutiliornissamut akuerineqarsimapput.
Gormillu aperineqarnini erngertumik akueraa.
3D atorlugu printerileruttortoq
Inu-IT 3D-printerimik Gormimut atukkiussisuuvoq, tamatumalu saniatigut Nuuk Kontorforsyning - Nuuk Offsetilu plastikkinik kiinnamut assiaqutiliassanik tunissuteqarlutik.
Aallartinniarnerali ajornaatsuinnaanngilaq. 3D-mik printerimi teknikkikkut unammillernartoqarpoq, kajumissuseqarluarnerli Nuummilu corona pissutigalugu killilersuisoqarnerani piffissaqarluarneq pissutigalugit tamarmik inissillutik.
- Taanna immaqa artornarnerpaavoq. Ippassaanikkunni eqqarsarpunga, tassa sussa unippunga. Iluatsinneq sapilerpara, kisianni tassa misileeqqikkaani ilungersoqqikkaanni iluatsillugulu nuanniinnartarpoq, Gorm Geisler Vold oqarpoq.
- Maannakkut sanaartorfittupajaaq sanaartorpunga.
Gorm angerlarsimaffimminit sanaartorpoq. Taassuma sanaavi ineriartortitassat Nakorsaaneqarfimmit akuerineqarput, sanaartuleruttorporlu.
- Ullormut 20-t tungaanut sanasinnaavakka. Sapaatip-akunneranut katersilaariarlunga peqqinnissaqarfimmut tunniussiniarlunga eqqarsarpunga. Ingerlaavartumik tunniussisarsinnaassaanga, Gorm Geisler Vold oqarpoq.
Taassuma kiinnanut assiaqutit sanaarisani tamarmik peqqinnissaqarfimmut akeqanngitsumik tunniunniarpai.
