Gorbatjov tv-qarfiliornialerpoq
Sovjetunionimi præsidentiusimasoq, Mikhail Gorbatjov, pisortatigoortumik oqallinnermut ernummateqarpoq, taamaammat Ruslandimi killiligaanani oqaaseqarsinnaaneq demokratiilu nakussassarniarlugu russit tv-qarfiannik pilersitsiniarpoq.
76-inimmi ukiulik Gorbatjov isumaqarpoq, ajornartorsiutit pingaarutillit Ruslandimi tusagassiorfinni maluginiarneqarpallaanngitsut. DR taama ilisimatitsivoq.
Demokratii killiligaananilu oqaaseqarsinnaaneq piunngippata, Ruslandimi susoqarnersoq innuttaasut paasisinnaanavianngilaat, tyskit russillu Kaliningradimi ataatsimiinneranni Gorbatjov ilaatigut oqarpoq.
Ammanerunissaq allanngortiterinissarlu Gorbatjovip 1980-ikkunni præsidentiunermini sulissutigai.
Gorbatjov aviisimi Novaja Gazetami siusinnerusukkut piginneqataasimavoq, aviisimilu tassani Anna Politkovskaja, aviisiliortuuvoq, siorna ukiakkut toqutaanissani tikillugu.
Ruslandimi maanna præsidentimut, Vladimir Putinimut Politkovskaja sakkortuumik isornartorsiuisarsimavoq.
