Gorbatjov suliniaqatigiiffimmik aallartitsivoq

Sovjetunioneqarallarmat præsidentit kingullersaat, siusinnerusukkut eqqissineqarnissamut suliaqarsimasunut Nobelip nersornaasiuttagaanik nersortisisimasoq, Mikhail Gorbatjov ullumi Københavnimiippoq. Gorbatjov Folketingimi ullaap tungaa oqalugiartussaagaluarluni, ualeq manna aviisimi Børsenimi oqalugiarpoq.
Allattoq Elisa Isaksen
oktobarip 24-at 2007 17:21

Mikhail Gorbatjov politikkikkut ullut makkua soqutigineqarluinnarpoq, tassami suliniaqatigiiffimmik nutaamik aallartitsisimagami.

Suliniaqatigiiffik nutaaq taaguuteqarpoq Socialdemokratit Unioniat, arfininngormallu aallarniutaasumik ataatsimeersuarluni. Suliniaqatigiffimmi suliassamittut pingaarnersaatippaat Ruslandimi demokratiip innarlerneqannginnissaa. 2001-imi Gorbatjovip partii Socialdemokratit aallartippai, ullumilumi nassuerutigaa socialdemokratiujuarluni, 2004-mili partiip siulersuisui isumaqatigiunnaarlugit partiimi ilaasortaajunnaarpoq. Politikikkulli aallaavini allanngortissimanngilaa, maannakulli Ruslandimi naalakkersuisut unammillernagit.

- Putinip inuiaqatigiinni iluarsaarusunnera tapersersorparput, 76-inik ukiulik Mikhail Gorbatjov oqarpoq, nangillunilu; Putinip maanna præsidentitut tunuarniarnerminik iluarsaassinera, ukiullu tallimat qaangiuppata uteqqinniassamaarnera inatsisitigut akornutissaqanngilaq. Gorbatjovip Ruslandimi inatsisartunut qinersinissaq isumalluarfigaa, taamanikkussamut Putinip partiiata, Det Forenede Ruslandip, ajugaarujussuarnissaa qularineqnngilaq, Putinilu nammineq qineqqusaartut nuimanersaattut inissisimavoq.

Mikhail Gorbatjovip suliniaqatigiiffik aallartitaa partiiunani suliniaqatigiiffiuvoq, taamaammallu Ruslandip inatsisartuinut qineqqusaarsinnaanani.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq