Googlemi nunap assingi nutarsarneqarput
Google Earth Google Mapsilu assilisanik nunarsuarmit tamarmeersunik isiginnaarnissamut sakkuupput nunarsuaq tamakkerlugu ilisimaarineqarluartut atorluarneqartullu.
Asiaq Kalaallit Nunaanni Misissueqqaarnerit Google suleqatigalugu timmisartumit assilisanik nutaanerpaanik Google Mapsimut Google Earthimullu inissiivoq, ilaatigullu Ilulissani, Sisimiuni, Nuummi, Paamiuni Qaqortumilu 2009-mi aasakkut assilisat takuneqarsinnaalerput.
Nunatsinnit assit nutaat ullumikkumut sukumiinerpaamik assilisaapput.
Assit nutarterneqarneri takornariaqarnermut pingaaruteqartorujussuusut Asiamit erseqqissaatigineqarpoq. Takornariat allallu tikeraat ornitami tikinnginnerani Google Maps-ikkut ornitartik takoqqaartarpaat. Aamma oqarasuaatit nutaaliaanerit smartphones-init atuisut Nunatsinniittut sumiiffigisaminnit assinik isiginnaarsinnaapput, taamaalillutillu maanniinnerminni sumiissusersiorsinnaallutik.
Assinilli nutaanik suliaqarneq akisuujusoq Asiamit oqaatigineqarpoq, taamaattumillu ukiut tamakkiallugit illoqarfiit assiginik nutaanik saqqummiisoqartassanngitsoq ilanngullugu erseqqissaatigalugu. Tamannalumi peqqutigalugu illoqarfiit nunaqarfiillu ilaasa assigi atorneqartut ukiunik qulinik qanganisaassuseqarput.
