Gonorrépalaarsuaq
Gonorrép antibiotikamit katsorsarneqartaraluartut, bakteriat taakkua maanna antibiotikamut akiuusinnaanngorsimapput, tamaammat nungusarneqarsinnaanissanut nakorsaamik allamik pilersitsisoqartariaqarpoq imaluunniit katsorsaanermi nakorsaatit sakkortunerusut atorneqartariaqarlerlutik.
Nunatta nakorsaanera Flemming Stenz Kleist naapertorlugu bakteriat nakorsaatinut akiuussinaaleriartortarput, taamaammallu gonorremut katsorsaatitut atorneqartut piffissap ingerlanerani allanik taarserneqartariaqartartut
- Gonorrémik katsorsaaanermi akiuussutissaq akiuussinnaajunaariartorpoq. Kingumut qiviaraanni ukiuni arlanlinni taamaasiartorpoq. Tassalu piffissap ingerlanerani eqqarsaatigisariaqalissavarput katsorsaanermi periaaserput allanngortissanerlugu, Flemming Stenz Kleist oqarpoq.
Gonorrépalaarsuaq katsorsaruminaatsoq Nunatsinni suli takussaanngilaq. Tamanna Aasiap kangianisulli antibiotikamik atuerujussuannginitsinnik peqquteqarunarpoq. USA-mi aamma antibiotikamik atuerujussuanngikkaluarput, taamaakkaluartorli gonorré-palaarsuaq tasamani siaruaassimavoq.
Nunatsinni ernumanissamut pissutissaqarluarpoq, Gonorré atugaasorujussuummat. Radioaviisimi sapaatip akunnerata siuliani oqaluttuaraarput Nunatsinni inuit 1435-it 2012-imi tunillatsissimasut. Tassalu inuttussuseq qissimigaaraanni Danmarkimi tunillatsissimasut 200-riaataaniit amerlanmerusut Nunatsinni tunillatsissimapput.
Nunatsinni nakorsaanerup oqaatigaa katsorsaatip antibiotikap nappaatinit akiorneqarsinnaanerulerani, katsorsaammik nutaamik maanna nassaarnissaq kissaatiginarsisikkaa.
Taamaanngippat nakorsaatit sakkortunerusut atorneqartaeriaassapput.
- Tassa avaanngunaqutaa. Nappaat katsorsarsinaaajuarniarukku nakorsaatit sakkortunerujartuinnartut atortariaqarakkit, taakkualu allatigut sunniuteqarsinnaapput. Taamalu ingerlassagutta pitsaanngilaq. Pitsaanerpaassagaluarpoq akiuussutissanik nutaanik, soorlu antibiotikatut ittunik, aamma gonorrémut akiuussinnaasunik nassaartoqaraluarpat, Flemming Stenz Kleist oqarpoq.
