GOIA: Suliniaqatigiiffiup Kalaallit Nunaanni aningaasarsiorneq iluaqusissavaa
Suliniaqatigiiffik kattuffik, Greenland Oil Industry Association novembarimili pilersinneqarsimavoq.
Pilersinneqarnerata kingorna Aatsitassarsiornermut Qullersaqarfik, Sulisoqarnermut Aatsitassanullu Naalakkersuisoq, Ove Karl Berthelsen aamma Kalaallit Nunaanni Sulisitsisut Peqatigiiffiat naapinneqareersimapput.
Uuliasioqatigiit pilersinneqarsimasut aningaasarsiornissaq soqutigisaraat. Taamaammallu Kalaallit Nunaat uuliasiorniarnermi aaqqissuulluakkamik illuatungilerneqarsimavoq.
Uuliasioqatigiit ataatsimut siunniussaqarnerata pilersippaa, pilersaarutinik tusarniaatitsinermi inatsisissatullu siunnersuutigineqartut oqinnerusumik suliarineqartalernissaat anguneqartassasoq, taama isumaqarpoq Greenland Oil Insdustry Associationip siulittaasua, Arne Rosenkrands:
- Suliffeqarfiit angisuut atasiakkaat illuatungiliussinnaalissapput, aammalu suligffeqarfiit mikinerusut peqataalernerisigut suliffeqarfiit angisuulluunniit oqaloqatigineqarsinnaalissallutik. Taamaaliornikkut isummat assigiinngitsut amerlisussaassapput. Tassami suliffeqarfissuit angisuut aningaasaqarnerat Kalaallit Nunaannut naleqqiullugu pitsaaneroqigami. Taamaattumik isumaqarpunga Kalaallit Nunaata tamanna ataatsimut isigalugu siunissami iluaqutigisinnaagaa.
Taama isumaqarpoq Arne Rosenkrands. Uuliaqarneranik misissuinermi kalaallit suliffeqarfiisa ilaannut suliaqartitsineq aallartereerpoq. Kalaallit Nunaanni suliffeqarfinnut attaveqarniarnerminni Kalaallit Nunaanni Sulisitsisut Peqatigiiffiat piginneqatigiiffissuarmit ataatsimeeqatigineqarsimavoq.