Godmand Rasmussen: Naalakkersuisut iliuuseqapallattariaqarput

Inatsisartuni Atassut sinnerlugu ilaasortaq Godmand Rasmussen raajat akii pillugit isumaqatigiinniarnerit unittoornerup suli sivisunerusunngorneranut naalakkersuisut akisussaasuunerarlugit sakkortuumik isornartorsiuteqarpoq.

-Utaqqisaqattaanneq piunnaarlugu naalakkersuisut akunnerminni pisuuteqattaarneq unitsillugu qanoq iliuuseqapallattariaqarput. Aalisarsinnaajunnaarneq sivisuumik uninngalissagaluarpat nunarput taamaaliornissaminut akissaqanngimmat tamatumunnga tunngavilersuutigaara. Isumaqarpunga Royal Greenlandi akisussaaffimmik tiguninnittutut oqaatigineqarsinnaasoq, kisianni inuiaqatigiit tamavitta taanna pigivarput. Royal Greenlandilu nikeriarsinnaanngippat allamik pisussaqanngilaq tassalu naalakkersuisut, Godmand Rasmussen oqarpoq.

Ilanngullugu oqaatigaa tupigusuutigalugu ataatsimiititaliamik pilersitsisoqarsimammat.

-Inuit atorfilittat qangali inissisimareersut soorlulusooq oqariartuutigisarsimasaat eqqunngitsutut nalilersorniarneqalersut. Sakkortugaluarpalluunniit oqartariaqarpunga nunarput ullumikkut immaqa ikummatissaarulluni unittuulersoq. Aalisariut ikummatissaqanngikkuni angalasinnaanngilaq. Akiliisinnaajunnaarnissamut nunatsinni aalisarnikkut inuiaqatigiinni akissaqartitsisoqanngilaq. Taanna naalakkersuisut paasisariaqarpaat. Aningaasarparujussuit pigineqanngillat. Utaqqisaqattaanneq unitsillugu piaarnerpaamik iliuuseqartoqarniarli, Godmand Rasmussen oqarpoq.