Godmand Rasmussen: Angalaneq aningaasanik atuipilunnerunngilaq

Inatsisartut Landskarsip Naatsorsuutaasa Kukkunersiorneqartarnerannut Ataatsimiititaliaata Danmarkimut angalanissaa, aningaasanik asuli atuipilunnermik ilaatigut taallugu Demokraatit siulittaasuata Jens B. Frederiksenip isornartorsiornera, ataatsimiititaliap siulittaasuata Godmand Rasmussenip paasisinnaannginnerarpaa.
decembarip 09-at 2008 11:25

- Ataatsimiititaliami ilaasortap nammineq akuerseqataaffigeriikkaminut taamatut oqarnera assut eqqarsarnartoqartippara. Tusaqqusaarnipalaatut nalilerusuppara.

Inatsisartuni suleriaatsit eqarpallaarnerat pissutaallutik naalakkersuisunik asoorallartitsisoqartartoq Godmand Rasmussenip oqaatigaa, nangipporlu:

- Savalimmiuni suleriaaseq pitsaalluinnartoq paasisassarsiorfigissavarput Danmarkimilu qullersaqarfimmi aallaavia aamma paasisassarsiorfigissallutigu. Suleriaasermi taama ittoq upernaamut eqqunneqartussaavoq.

Savalimmiuni Inatsisartut Landskarsip Naatsorsuutaasa Kukkunersiorneqartarnerannut Ataatsimiititaliaat ullormiit ullormut malinnaapput.

- Taamaattumik aningaasanik missingersuutinik qaangiinerit ingerlaannarlugit malugisarpaat. Ataatsimititaliaq aamma suliffeqarfinnut uparuaasinnaatitaavoq. Taamatut suleriaaseqarneq iluatigalugu, aningaasanik pinnguarnerunngitsumik ataatsimiititaliami pisussaaffipput atorlugu, angalaniarnitta taama nalilerneqarnera assut eqqumiigaara, Godmand Rasmussen oqarpoq.