Godmand Petersen: Ikiorumanngimmannga takkutinngilanga
Siumumi siulittaasutut unammillertup aappaata, Kangaatsiarmiup Godmand Petersenip, Sisimiuni ataatsimeersuaqataannginnerminut partiip siulittaasua Hans Enoksen akisussaaqataanerarpaa.
-Ikiorumallunga neriorsoriarlunga tutsaqaqqinngilaq, Godmand Petersen oqarpoq.
Siumup Kangaatsiami immikkoortortaqarfia aningaasatigut ajornartorsiorpoq, taamaattumillu ataatsimeersuarnermut aallartitaqarnissani akissaqartinnagu. Immikkoortortaqarfiup siulittaasua Jakob Ludvigsen ilisimatitsivoq immikkoortortaqarfiit peqataassagunik 7000 kr.-nik akiliisussaasut, aningaasalli taakku Kangaatsiami immikkoortortaqarfiup piginngilai.
Siulittaasumut unammillertoq Godmand Petersen Sisimiunukarnissaminut nammineq periarfissarsiorpoq iluatsitsigalluarlunilu, utimulli akissaqannginnami Hans Enoksenimut saaffiginnippoq Sisimiuniit angerlamut akiliunneqarnissani qinnutigalugu.
-Partiip siulittaasuata nerorsoraluarpaanga piaartumik attaveqarfiginiarlunga, attaveqarfiginngilaangali, uangalu arlaleriarujussuarlunga misilittaraluarpara, oqarasuaatinili tiguneq ajorpaa, Godmand Petersen oqarpoq.
Siulittaasumut unammillertuulluni ataatsimeersuaqataasinnaanani ilungersunarnerarlugu Godmand Petersen isumaqarpoq.Qineqqusaarutissani allareersimagaluarpaa, Sisimiunulli apuunnissaa qularaa.
-Faxikkulluunniit nassiunnissaa angumerisinnaagunanngilara, Sisimiuni ataatsimeersuartut attaveqarfiginiartaraluarakkit iluatsissinnaanngilakka, Godmand Petersen oqarpoq.
Siumup siulittaasua Hans Enoksen ualiartoq oqarpoq Godmand Petersenip saaffiginnissutaanut siulersuisuunerit itigartitsisimasut, inuttaali aalajangernermik apuussiffigineqarsimanngitsoq.
- Godmand Petersenip nalunaarfigereerpaanga Sisimiuliarniarnani, qineqqusaarutissanilu allakkatigut nassiunniarlugit. Taakku ullaaq ujartoraluaratsigit inuttaa attaveqarfigisinnaasimanngilarput, Hans Enoksen oqarpoq.
Siumup aqagu siulittaasussarsiornerani unammisut marluinnaasutut massakkuugallartoq oqaatigineqarsinnaapput, tassalu massakkut siulittaasuusoq Hans Enoksen aamma naalakkersuisuni ilaasortaq Jørgen Wæver Johansen. Johansenip aappaa, Lars Emiili, unammillissanersoq aqagu ulloqeqqanut nalunarunnaassaaq, taamaalippammi qinigassanngortiffissaq qaangiutissaaq.
