GME qinnuteqaammik ingerlatsivoq

Piginneqatigiiffik Greenland Minerals and Energy piiaanissamut akuersissummik qinnuteqaammik allagaqangajalerpoq.

Tamannali pitinnagu avatangiisit aamma suliniutip isumaginninnikkut kingunerisassai pillugit nalilersuisoqaqqaassaaq. Misissuinerit taama ittut annertupput akisullutillu, GME-p 50 million koruunit manna tikillugu pissarsiarereersimavai.

Niuertut aningaasarsiuteqartullu allat niueqatigiittarfiata nalunaarsugaani GME-p ingerlateqqitaani tamanna atuarneqarsinnaavoq. Aningaasaliisut ilaatigut tassaapput danskit soraarnerussutisiaqarneq pillugu aningaaserivii allallu suliffeqarfiit.

GME qinnuteqaasiornissaminut akissaqalereeraluartoq piaalluni aallartinnissaq suli ungasippoq. Misissuinerit pisariaqartinneqartut suliarineri sivisusarput, qinnuteqaallu nassiunneqariarpat tusarniaassutigineqaqqaassaaq.

Uranimik piiaaneq tunisassiornerlu pitinnagit inissitassat allat aamma arlaqarput. Nunanik tamalaanik isumaqatigiissutit arlallit malinneqartussaassapput, taakku ilaanni Danmark suleqatigineqartariaqassaaq.

Kuannersuarni suliniut ukiorpaalunni oqaluuserineqartarsimavoq. Attueqqusinngilluinnarnissamik aalajangersagaq siorna atorunnaarsinneqarmat suliniutip piviusunngortinnissaa aqqutissiuunneqarpoq.