GME-p nunani allani akuiaatitsiniarnera politikkikkut apeqquserneqarpoq
Narsap timaani, Kuannersuarni aatsitassanik qaqutigoortunik piiaanissap imminut akilersinnaasusaa misissoreerlugu, Greenland Minerals and Energyp, tassa GME-p, suleriaatsini allanngortinniarpaa, aatsitassanillu piiaanissaq suliniutitut angisuutut saqqummiunneqarnera allanngorlugu.
Aatsitassat qaqutigoortut piiarneqarnerisa kingorna, aatsitassat qaqutigoortut uranitaasa allallu akuisa ulorianarsinnaasut immikkoortinneqarneranni fabrikimik Narsap eqqaani pilersitsinissaq siunertaagaluarpoq. GME-li taamaaliorani, aatsitassat nunanut allanut nassiussuunnialersaarpaat, aatsitassanik uranitalinnik suliarinnittartunut misilittagalinnullu immikkortitsertillugit. GME-p ingerlatsinermut pisortaa, Ib Laursen, taama oqarpoq.
Taamaliorniarnerallu suliffinnik annaasaqaataassasoq, Siumup politikkikkut oqaaseqartartuata Karl Lyberthip oqaatigaa:
- Aatsitassap annillugu nunami allami suliarineqarnerani kingunerissavaa nunatsinni suliffissat pilersinneqartussaagaluit pilersinneqanngitsoornerat. Taanna uggornarpoq. Taamaattumik taassuma takuteqqiinnarpaa annissuinermi pinngitsoornani akiliisitsisarnissaq, royaltymik taasagarput, taassuma atuutsinneqarnissaa pinngitsoorneqarsinnaanngitsoq, Siumup politikkikkut oqaaseqartartua Karl Lyberth oqarpoq.
Naak GME taama pilersaaruteqaraluartoq, aatsitassat piiarneqartut annissorneqartullu uranimik akoqanngilluinnarnissaannik politikki Inuit Ataqatigiit attakkaat, politikkikkut oqaaseqartartuata Aqqaluaq B. Egedep oqaatigaa, imatullu nangilluni:
- Imermik atuineq, avatangiisit, nunamik atuineq, uumasuuteqarneq, aalisartut akornuserneqannginnissaasa qulakkeerneqarnissaa. Apeqqutit tamakku tamaasa nassuiarneqarsinnaatinnagit nultolerance atorunnaartinniarlugu partiinit allaninngaanniit oqartoqarnera isumaqarpunga mianernaatilerujussuuvoq inuiaqatigiinnut akornusiinngitsumik ineriartussagutta, Aqqaluaq B. Egede oqarpoq.
Aatsitassat annissorneqartut akitsuuserneqarnissaat, tassa royaltymik taaneqartartumik akitsuuserneqarnissaat, Siumup piumasaraa. Isuma taanna IA-mit apeqquserneqarpoq:
- Royalty uagut toqqaannavillugu akerlerinngilarput, aamma paaseqqaarusupparput akileraarutinut allanut sanilliullugu qanoq pissarsissutaatigisinnaanersoq. Royaltyp 10 procentinik tagginneqarnerata ulorianaqutigivaa aatsitassat akiisa appariartornerat ilutigalugu 10 procenti taanna isertinneqartartoq annikilliartortussaammat, Inuit Ataqatigiit politikkikkut oqaaseqartartuat Aqqaluaq B. Egede oqarpoq.
