GME: Malmi Kuannersuarni piiarneqartoq nunani allani immikkoortiterneqartassaaq
Siunertaagaluarpoq aatsitassat qaqutigoortut piiarneqarnerisa kingorna, aatsitassat qaqutigoortut uranitaasa allallu akuisa ulorianarsinaasut immikkoortinneqarneranni fabrikkimik Narsap eqqaani pilersitsinissaq. GME-li taamaaliorani, aatsitassat nunanut allanut nassiussuunnialersaarpaat, aatsitassanik uranitalinnik suliarinnittartunut misilittagalinnullu immikkortitsertillugit, taama oqarpoq GME-mi ingerlatsinermut pisortaq, Ib Laursen.
- Aatsitassat qaqutigoortut piiarneqarneranni taakku akuinik immikkoortiterivimmik Narsap eqqaani pilersaarut taamaatinneqarpoq.
Ib Laursenip aamma oqaatigaa, malmi aatsitassanik qaqutigoortunik akulik, Narsap eqqaanit piiarneqartoq immikkoortiteriarlugu, nunanut allanut nassiunneqartassasoq, tassanilu malmip akui immikkoortitertillugit.
Taama pilersaaruteqalernerup pilersissavaa, Narsap eqqaata avatangiisiisa mingutsinneqarnissaat pinngitsoortinneqarsinnaalissammat, Ib Laursen oqarpoq.
GME-p naatsorsuutigaa, aatsitassanik qaqutigoortunik Narsap eqqaani piiaanialersaarneq kikkunnit tamani akueriuminarnerulissasoq malmi piiarneqartoq nunanut allanut akuiartinneqartalerpat.
- Siunertaraarput piiaanissarput Kalaallit Nunaannut ulorianaataajunnaarnissaa aamma innuttaasut taamaalillutik peqataanerunissaat aammalu suliffissaqarnissaat siunertaralutigu. Taamaattumik piiaanitsinni kujataani innuttaasut aamma peqataatinneqarnerlernissaat angussallutigu, Ib Laursen oqarpoq imalu nangilluni.
- Pilersaarutitta allanngortinneranut pissutaanerpaavoq, aatsitassat suliarineqarnerisa Narsap eqqaanut ulorianarunnaarnissaa. Narsap eqqaani malmimik aserorterivimmik pilersitsissaagut tassanilu aatsitassat pingaaruteqarluartut immikkoortiterlugit, kemi atornagu. Tamatuma kingorna aatsitassat atorfissaqartitat umiarsuarmik nunaut allanukaanneqartassapput, tassanilu uranit allallut ulorianarsinnaasut immikkoortiterneqartassallutik, GME-mi ingerlatsinermut pisortaq, Ib Laursen oqarpoq.
