Assi: Merete Lindstrøm

Kuannersuit: GME akuersissutit pillugit isumalluartoq

Greenland Minerals and Energy (GME) Kuannersuarni suliniut pillugu isumalluarpoq. Pisortaq aatsitassarsiorneq pillugu Canadami sapaatip akunnera kingulleq nittarsaassinerup kingorna taama nalunaaruteqarpoq.

Suliaq sivisooq 2007-imili aallartittoq qanittukkut alloriarnermut tullermut ingerlaqqissinnaanngussaaq.

Tassami Greenland Minerals and Energymi pisortaaneq, John Mair, Kuannersuarni aatsitassarsiornermik suliniummut atatillugu VVM-imik aamma VSB-mik nalunaarusiat piffissami qaninnerpaami akuerineqarnissaat pillugu isumalluarpoq.  

- Qularinngilluinnarparput sunniutissat pillugit nalunaarusiat tamanut tusarniaassutigineqarlutik saqqummiunneqarnissaminnut piareertut, John Mair KNR-imut oqarpoq.

- Siunnersuisut immikkut ilisimasallit attaviitsuusut isumaqarput suliniarnerit annertunerusut paasisanik naammasseriikkanik allanngortitsinavianngitsut, tassami suliniut avatangiisinut, sulisunut inuiaqatigiinnulluunniit qanittumiittunut navianartorsiortitsinani kalaallit soqutigisaannut iluaqutaasussamik sunniutilimmik kinguneqartumik ineriartortinneqarsinnaammat, pisortaq oqarpoq.   

Taanna oqaluttuarpoq VSB-mik nalunaarusiap misissorneqarnera naammassereersoq aammalu VVM-imik nalunaarusiaq piareertinnani annikitsuinnarmik nutartigassartaqartoq. Sunniutissanik nalunaarusiat taakku marluk tamarmik aamma nutserneqarneri naammassereerput.

VVM-imik nalunaarusiaq siulleq 2015-imi tunniunneqarpoq

Suliniummilli ingerlatsineq sivisoqalunilu pisariusimaqaaq, pisortaq erseqqissaavoq.

VVM-imik nalunaarusiaq siulleq 2015-imili tunniunneqarpoq, ukiunilu tulliuttuni pingasuni sunniutissanik nalunaarusiat tunngavigisaannik misissuinerit ilassutissaat immikkuualuttut nutarterneqartaraluartut tassa suli akuerineqarnerinik kinguneqanngilaq. Pisortap tamanna paasisinnaanngilaa. 

AAMMA ATUARUK Kina saffiugassanik qaqutigoortunik Kuannersuarneersunik pisiortorusuttoq

- Suliniutip misissorneranut nalilerneranullu pullaveqarnerput tatigineqartariaqaraluarpoq - sammisat tamaasa eqqarsaatigalugit isumalluutit nassuiarnerinit, aatsitassat pissutsimikkut akoqarnermikkullu misissorneqarnerannut aamma avatangiisinut inuiaqatigiinnullu malittarisaasut misissorneqarnerisa nalunaarusiarineqarnerinut. Kalaallit Nunaanni suliutit allat arlaannaalluunniit Kuannersuarni suliniutip misissorneqarneratut sukumiitigisumik misissorneqarnikuunngillat, pisortaq oqarpoq.  

Paasissutissat
- VVM-imik nalunaarusiaq tassaavoq avatangiisinut sunniutit nalilerneqarnerat. 
- VSB tassaavoq Inuiaqatigiinni Piujuaannartitsisumik ingerlatsinermik nalilersuineq.
- IBA tassaavoq Naalakkersuisut kommunip aatsitassarsionermillu ingerlatsisut akornini assersuutigalugu pisiniarnermut isumaqatigiissutinut piffimmilu sulisunik atuinissamut tunngasut pillugit suleqatigiinnissamut isumaqatigiissut.

Taamaattorli siorna aatsitassarsiorneq pillugu Canadami nittarsaassinerup kingorna John Mair isumalluarpoq. 

Tassami piiaanermut akuerineqarnissamik qinnuteqarnernut atatillugu allaffissornerujussuup taamaatinneqarnissaa politikerit kalaallit piumassuseqarfiginerulersimagaat isumaqarpoq.  

- Qinnuteqaatit suliarinerini naammassisaqarnerusumik suliaqartarnissap pisariaqarnerata eqqumaffiginerulerneqarnera qularnanngilluinnarpoq. Tamanna Kalaallit Nunaanni suleriaatsip assut sanngeequtigaa aningaasaliisartullu Kalaallit Nunaannik tatiginninnginnerannut pingaarutilimmik peqqutaalluni, John Mair oqarpoq.

Allaffissornikinnerulernissaq isumaqatigiissutigaat

Soorlumi tamanna pillugu politikerit arlallit pisortaq isumaqatigigaat.

Naalakkersuisoq Erik Jensen (S), Demokraatineersoq Randi Vestergaard Evaldsen aamma Inuit Ataqatigiit siulittaasuat, Múte Bourup Egede, nittarsaassinermi oqarput aatsitassarsiornissamut qinnuteqaatip suliarinerata qinnuteqarnerullu ingerlanneqarnerata sivisoqisup suliffeqarfinnut oqilisarnissaat sulissutiginiarlugu. 

Erik Jensenip KNR-imut erseqqissarpaa sulineq ingerlasoq:  

- Soorunami allaffissorneq sammingaatsiagassatsinnut ilaavoq. Iserfissaq ataaseq atorlugu sullissinissaq sulissutigaarput, imaaleqqullugu Kalaallit Nunaanni nunamut tamarmut iluaqutaasussamik aningaasaliinissaq pilerinarnerulersinniarlugu, Erik Jensen oqarpoq.

AAMMA ATUARUK Kuannersuit suliffippassuarnik pilersitsiffiunissaat Berthelsenip neriuutigaa

Greenland Minerals and Energyp VVM-imik VSB-millu nalunaarusianik suliaqarneri pillugit Aatsitassanut Aqutsisoqarfik nutaanik nalunaarutissaqanngilaq. Aqutsisoqarfiulli ilumoornerarpaa qinnuteqarnerup ingerlanneqarnerani immikkuualuttut kingulliit suli sulissutigineqartut.  

- VVM-imik missingersuummik nalunaarusiaq VVM-imik maleruagassiat tunngavigalugit ingerlatsivik qinnuteqartoq nangittumik oqaloqatigisaripput nalunaarutigisinnaavara. Ingerlatsiviup assigiinngitsut pillugit paasissutissat nutarterpai - ilaatigut qaarsunut igitassanut, silaannaap pitsaassusaanut aamma tailingsinut (saffiugassiassanik piiaanermi igitassatut sinnikunut) tunngasut, Najaaraq Demant-Poort, Avatangiisinut Aqutsisoqarfimmi Aatsitassanut tunngasutillugu pisortaq paasissutissiivoq.  

Suliaq aamma Aatsitassanut Suliffeqarnermullu Naalakkersuisoqarfimmi aamma Inuussutissarsiornermut Nukissiuuteqarnermullu Naalakkersuisoqarfimmi ingerlanneqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat