GME–mi talitik suli qulerinngilaat

Aatsitassarsiortitseqatigiffilli qilanaalereernianngilaq. Uran oqallisigissallugu suli mianersornarpoq naalakkersuisoqatigiissanillu suli pilersitsisoqanngilaq.

Aleqa Hammondip partiit allat siuttui isumaqatiginniarnissanut atatillugu ullumi kaffillerfiginiarpai. Naalakkersuisunngornissarlu siunertaralugu isumaqatigiinniarnssat GME-mit pissangalluni malinnaaffigineqarput.

- Ilumoorpoq, soqutiginneqaluta malinnaavugut. Tassami pilersaarutitta piviusunngortinniarnera eqqarsaatigalugu qanoq inatsisiliortoqarnera  apequtaalluinnarpoq, uagullu inatsisit maleqqinnaarpagut. Soorunamilu Naalakkersuisunngortussaq aatsitassarsiorneq pillugu qanoq politikkeqarumaarnersut, uatsinnut soqutiginarpoq. Kisianni naalakkersuisunngortitsiniarneq utaqqisariaqarparput, GME-mi ingerlatsinerrmi pisortaq, Ib Laursen, oqarpoq.

Aleqa Hammondili tusagassiortunik ippassaq katersortitsigami aatsitassarsiornermi akilereraartitsinermut Siumup politikkianik eqqaasitsivoq, tassalu:

-  Royalitiesinik atuutilersitsinissaq aammalu uranimik akuerisamik  piiaarneqartup annerpaaffilernissaa pingarnerpaapput, Aleqa Hammond ipassaq oqarpoq

Ib Laursenilli politikkikkut isumaqatigiinniarnissat oqaseqarfigerusunngilai, talinilu suli  qulimiorinagit.

- Kalaallit Nunaanni inatsisit qanoq ittuulerumaarnera suli ilisimalertinnagu, tigussaasumik oqaaseqarnissatsinnut suli siusippallaaqaaq, GME-meersoq Ib Laursen oqarpoq.