Sungiusaasoq: GM PAN AM-imut neriulluartitsivoq
Assammik arsarluni Amerikap nunavittaani pissartanngorniunneq Nuummi juunip ulluisa 16-iannit 24-ata tungaanut ingerlanneqassaaq.
Nunatsinnilu sapaatit akunnerata ingerlanerani pissartanngorniuttoqarnerani misilittakkat naapertorlugit piareersimasugut, nunanut allanut unammisartut sungiusaasuat isumaqarpoq.
- Neriulluarnarpoq. Assigiinngitsut misilinneqarput. Aaqqissuussami isumagisassat naliginnaasut soorunami mianersuunneqassapput, Ingi Olsen oqarpoq, nassuiaallunilu.
- Pan Amimut isumannaallisaanermut piumasaqaatit sukannernerupput. Kiisalu atisalersortarfiit kissassernermullu tunngasoqarpoq, inuillu amerlanerussallutik.
Nuannersumik tupaallattoq
Assammillu arsartartut piginnaasaqarnerminnik sapaatit akunnerata ingerlanerani takutitsilluarnerat nunanut allanut unammisartunut sungiusaasup nuannaarutigaa.
- Kalaallit Nunaanni piginnaasallit kikkuunersut nalunngikannerpara, arsartartulli ilaat arajutsisitsillutik sungiusarsimasut, uangaluunniit arajutsisimasakka, nuannersumik tupaallatsippaannga, Ingi Olsen oqarpoq.
Kikkulli nuannersumik tupaallatsitsisimanersut suli oqaatigerusunngilaa. Taakku kikkuunersut sapaatit akunnerani aggersumi saqqummiunneqassaaq.
AAMMA ATUARUK Kalaallit unammisartui Nuummi VM-imut anngukkusupput
Pan Amimi tamaviaartariaqartut
Unammeqataasut ullut tamaasa unammisarmata nunatsinni pissartanngorniunnermut peqataaneq ilungersunartoq, sungiusaasup oqaatigaa. Arsartartullu qasusarsinnaagaluarlutik unammigaangamik tamaviaartarput, tamannalu neriulluartitsisoq Ingi Olsen oqarpoq.
- Iligiit, soorlu Kalaallit Nunaanneersutut ittut, angusaqarluarnerpaat pingasut akornanniissappata, 100 procent sinnerlugu ilungersortariaqartarnissaat nalunngilarput, taamaammat arsartartunik taama piginnaanilinnik, tassalu tamaviaartuaannarsinnaasunik ujartuivugut, Ingi Olsen oqarpoq. Taanna nunanut allanut unammisartunut siorna sungiusaasunngorpoq, Niels Møller taarserlugu.
AAMMA ATUARUK Ingi Olsen nuna tamakkerlugu assammik arsarnermi sungiusaasunngortoq