GM-mut puljenut makitsipput

Angutit arsaallutik pissartanngorniunnissaanni pulje 2 sakkortussaqaaq. Tassaniippummi siorna sølvinnattut B-67 Nuummeesoq, Kugsak 45 Qasigiannguit aamma Nagdlúnguak Ilulissanniik. Puljeqataat allat tassaapput Nagtoralik Paamiuniit aamma ATA Tasiilamiik.

Nagdlúnguaq, B-67 aamma Kugsak 45 pissartanngorniuttarnerni misilittagaqarluaraluartut Nagtoralik aamma ATA unammillerluarsinnaapput.

- Assut Nagtoralik nuannersumik tupaallaatigaara kujataani anngunniuttut malinnaaffigigakkit. Nagtoralimmiut iligiittut suleqatigiillaqqinnertik assut nukittoqutigaat, GBU-mi siulittaasoq Lars Lundblad KNR-imut oqarpoq.

Puljep aappaaniipput UB-83 Upernavik, Eqaluk 54 Tasiusaq, G-44 Qeqertarsuaq, SAK Sisimiut aamma FC Malamuk Uummannamiik.

- Pulje 1-mi assut naligiinniarunarput. G-44 siorna pissartaavoq, kisianni aamma tusaamavarput FC Malamuk ukiormanna sakkortunerusoq aammalu Eqaluk 54 anngunniunnerni arsarluaqattaarluni, Lars Lundblad oqarpoq, aammali UB-83 SAK-lu suli tupaallatsitsisinnaasutut isigalugit.

Taanna suli mianersorpoq ajugaassangatitanik taaguinissaminut siorna pisut eqqaallugit.

- Puljeni tamani iligiit tallimaatillugit qanorluunniit pisoqarsinnaasarpoq. Siornami makitsineq aqqusaaqqaarlugu kikkut semifinalemut anngunnersut paasivarput, Lars Lundblad oqarpoq.

Aajuna puljenut agguataarnerat:
Pulje 1:
UB-83, Upernavik
Eqaluk 54, Tasiusaq
G-44, Qeqertarsuaq
SAK, Sisimiut
FC Malamuk, Uummannaq

Pulje 2:
B-67, Nuuk
Kugsak 45, Qasigiannguit
Nagdlúnguak, Ilulissat
Nagtoralik, Paamiut
ATA, Tasiilaq