Gigtertut atuarfissaannik pilersitsiniartoqarpoq

Gigtertorpassuit nappaatertik qanoq iliussanerlugu nalornisarput. Nuummi gigtertut peqatigiiffianni pingasunngormat ataatsimiinnermi tamanna erserpoq. Taamaattumik Dronning Ingridip Napparsimmavissuani pillorissaasup, gigtertut peqatigiiffiat suleqatigalugu, gigtertut ilinniarfissaannik aallartitserusuppoq.

Napparsimmavissuarmi siulersuisunit siullermik akuerineqaqqaassapput, aammali atuartussanik amigaateqarlutik. Atuarfiup suna imarissaneraa inissikannereeraluarpoq.

- Inuunerup sinnerani nappaateqarnerminni nappaatimi pitsaanerusumik atorneqarsinnaanera atuagarsornikkut timersornikkullu ilinniartassavaat, pillorissaasoq, Rikke Dyrgaard, oqarpoq.

Stanfordimi katsorsaariaaseq isumassarsiorfigalugu atuartitsisoqartassaaq, tassa gigtertut namminneq gigtertunik allanik atuartitsisarlutik

- Aallaqqaammut ajornakusoornissaa naatsorsuutigaarput, neriuppugulli iluatsikkumaarlugu. Nammineq nappaateqartumit ilinniartinneqartarneq, ilinniarsimasumit ilinniartinneqarnermit pitsaanerusarpoq, Rikke Dyrgaard oqarpoq.

Rikke Dyrgaardip naatsorsuutigaa, inuit tallimat arfinillilluunniit pingasoriarlutik tallimariarlutilluunniit ilinniartinneqarsinnaasassasut, apeqqutaassaarli sinerissamiit Nuummiilluunniit peqataasoqarnersoq.