GIF: Meeqqat AWG-mut peqataatinneqarneq ajorput
- 2000-imi inunngorsimasut 13-it inuusunnerpaatut peqataapput, taakkunani affai 14-ileereersimallutik. Pineqartut timersuutini ukunani peqataapput: Arctic Sports, Alpin, Sulorarneq, Basketball, isikkamik arsaanneq, Snowboard aamma nerrivimmi arsaararnermi, Carsten Olsen allappoq.
Kim Godtfredsenip radioaviisimut aamma oqaatigaa, meeqqat taama ukiukitsigisut AWG-mut peqataatinneqartarneranni taakku isumaqalersarmata, AWG tassaasoq angusassaq annerpaaq.
Taamali meeqqat inuusuttuaqqallu eqqarsartartut amerlanngitsut, Carsten Olsenip allakkamini eqqaavaa, oqarluni meeqqat inuusuttunngornerminni aamma Nunarput sinnerlugu nunarsuatsinni peqataasartut amerlammata, Kim Godtfredsenip taama naliliinera ilumoorpianngimmat.
- Imaanngilaq Arctic Winter Games seniorini timersortartutut angusassani qaffasinnerpaajusoq, nuna tamakkerlugu nunarsuarmioqatigiinnilu unammersuartarnerit aqqutigalugit angusassat qaffasinnerusut anguneqarsinnaapput, tassanilu sumiiffinni nunalu tamakkerlugu sungiusaasut inuusuttunik qaffasinnerusumik angusaqarnissaanut tinnersaasuusussaapput taamaaliortarlutillumi, Carsten Olsen allappoq nangillunilu ima allalluni.
- Martin Møller assersuutissatsialaavoq, Arctic Winter Games-imut peqataasimagaluarluni unammiuaarnerit qaffasinnerpaat anguneqarsinnaaneranut. Taamaattumik inuusuttuni piumassuseqalersitsivittarneq apeqqutaavoq, klubbini tusamasanngortinnissaat pingaarnerunani. Sungiusaaneq naleqqussagaq siumut aqqutissaavoq, Nunatsinni Timersortartut Kattuffiata, GIF-ip generalsekretæria, Carsten Olsen allappoq.
