GIF-ip meeqqat toqqisisimanissaat pingaartippaa
Meeqqanik pinerliisimannginnermut uppernarsaatinik sullissilinnginnermi tunniussisarneq pingaaruteqartorujussuusoq, Kalaallit Nunaanni Timersoqatigiit Kattuffianni siulittaasup Nuka Kleemannip oqaatigaa:
- Tamatumunnga peqqutaavoq, taamatut pinaveersaartitsineq perusunnerugatsigu, suliassat assigiinngitsut allartinnginneranni aallartisassalluta aammalu eqqumaffigisassat assigiinngitsut maanna suliniutigilernissaat pingaartikkatsigu, Nuka Kleemann oqarpoq.
Meeqqanik pinerliisimannginnermut uppernaarsaatinik takussutissaqanngikkaanni timersoqatigiiffinni assigisaannilu sullissisinnaaneq ajornarnerulerpoq siorna aggustip aallaqqaataani inatsisip atuutilernerani.
Timersoqatigiit assigiinngitsut ukiuni kingullerni meeqqanik innarliisimasunik naammattuuineq ajoraluarlut, taamaattoq tamassuma eqqumaffiginissaa Kalaallit Nunaanni Timersoqatigiit Kattuffiata pingaaruteqartoq unnerpaa:
- Pingaaruteqarpoq taanna klubbiminnut uppernassallugu, taamatullu iliortoqarsimanngippat eqqumaffigineqarsimanngippallu uagut pisussaaffigaarput klubbit toortalaassallugit uku ukulu aaqqitassaasut, Nuka Kleemann oqarpoq. Taassuma erseqqissarpaa ukiorpaalussuit matuma siorna ataasiaannarlutik misigisimallugu meeqqanik innarliisimasunik timersoqatigiiffimmi ataatsimi sulisoqarsimaneranik, taamaakkaluartorli tamassuma paasisitsigiuarnissaa pingaaruteqartoq aamma oqaatigalugu.
