GIF innersuussivoq: Timersuutit ingerlanneqaqqissinnaalerput
Timersuutit assigiinngitsut ingerlanneqaqqissinnalernissaat Kalaalit Nunaanni Timersoqatigiiffiit Kattuffiannit taperserneqarpoq. Kattuffiktusagassiutinut nalunaarummi taama allappoq.
Timersuutit ingerlanneqarsinnaalersut, timersoqatigiiffiit kattuffiat allappoq.
Allattoq Ivik Kristiansen, Marie Kûitse Kristensen
maajip 02-at 2020 17:02
Oqartussat paasissutissiissutaat nutaat tunngavigalugit timersuutit assigiinngitsut soorlu illup ilani silamilu arsaanneq, assammik arsarneq, volleyball, Arctic sport Taewkwon-do ingerlanneqarsinnaalertut, kattuffik allappoq.
Sulili malittarisassaqartoq mianersuutassaqartorlu kattuffiup erseqqissaatigaa, malittarisassallu tamanit malinneqarnissaat kaammattuutigalugu.
Kattuffiup uku erseqqissaatigai:
- Inip isersimaffigisaq inunnik isersimaffigineqarnissaanut Qatserisartut akuerisimasaata affaa (50%) taamaallaat isersimaffigineqarsinnaavoq, amerlanerpaamilli inunnik 100-nik isersimaffigineqarsinnaavoq.
- Sapinngisamik qaninnerpaamik 2 meter tikillugu ungasittarit, iligiikkaarluni timersuutit kiisalu timersuutit inummiit inummut attuisinnaasut ingerlanneqarsinnaapput aatsaat peqataasunit timi nualluummit ersiuteqanngippat.
- Eqqiluisaarnissamut oqartussanit malittarisassat malinneqassapput.
- Allarut illit kisivit atoruk.
- Timersuutini atortut, atisat, qaqorsaatit eqqiluisaarnissamullu atortut allat inoqaternut allanut avitseqatigissanngilatit.
- Imerfiit illit kisivit atoruk, allanut avitseqatiginissaa pinaveersaartiguk.
- Inoqaternut eqitaarineq assamminnerlu pinaveersaartiguk.
- Ataavartumik eqqiluisaarneq pingaartiguk, sumiiffigisimasat, attorsimasat, assersuutingalugu matup tingummivii, elevatori, sungiusarnermi atortut assigisaalu ataavartumik asattakkit.
- Timinni nualluummik tunillatsissimanissamut ilisarnaatit pigingukkit imaluunniit napparsimaguit angerlarsimaannarit.
Malittarisassat suunersut Nunatta Nakorsaaneqarfiata nittartagaatigut nun.gl-ikkut malinnaanissaq kattuffiup kaammattuutigaa.
