GIF-imi siulersuisut isornartorsiuineq tupaallaatigaat

Kalaallit Nunaanni Timersoqatigiiffiit Kattuffianni – GIF-imi - siulersuisut Timersoqatigiiffiit Kattuffiata ilisimasaqanngitsutut iliorluni isornartorsiuineq tupaallaatigaat, isornartorsiuineq Inatsisartut Aningaasaqarnermut Ataatsimiititaliaanit kukkunersiuinermi isumaliutissiissummi saqqummersoq. Tassani Aningaasaqarnermut Ataatsimiititaliap isornartorsiorpaa Kalaallit Nunaanni timersornermut aningaasaliissutit 40 procentii angullugit allaffissornermut atorneqartartut.
novembarip 15-at 2007 12:03

GIF isumaqarpoq isornartorsiuineq silaannarmit tigusaasoq, aammalu Kalaallit Nunaanni Timersoqatigiit Kattuffianni suliniutit assigiinngitsut arlaqaqisut isornartorsiorneqarsinnaanngitsut tunngavigineqartut. Taakkua aningaasaqarnermut Ataatsimiititaliap isornartorsiuinera ”kisitsisinik angakkuarnermik” taarusuppaat isumaqarlutillu isornartorsiuineq inuit ilaannik imaluunniit partiit politikkiannik takutitsiniarnermut ersiutaanerusoq.

GIF nammineq isumaqarpoq allaffissornermut tunngasut 25 procentit missaanniittut aammalu kisitsisit taakkua naapertuutinngitsut suliassat timersoqatigiiffiit kattuffiata isumagisartagai qiviassagaanni.

GIF-ip aammattaaq Aningaasaqarnermut Ataatsimiititaliap annertunerusumik nakkutilliinissamik, politikkikkut aqutsinissamik kiisalu Namminersornerullutik Oqartussat GIF-illu akornanni naammassisassat pillugit isumaqatigiissuteqarnissamik piumasaaqaatai mianersoqqussutigai.

Tamakkua illuatungeriinnut allaffissornermut aningaasartuutit amerleriarnerannik kinguneqaannassapput, GIF-imiit oqaatigineqarpoq, GIF-ilu isumaqarluni Aningaasaqarnermut Ataatsimiititaliap isumaliutissiissutaa timersornermi atugassarititat pillugit kingunissaqarluartumik oqallinnissamut atorsinnaanngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq