Coronamut killilersuutit pissutigalugit nuna tamakkerlugu aappaagu unammersuarnissanut periarfissakippoq.Assi: Noah Mølgaard

GIF: 2021-mi GM-ertoqarsinnaanera qularnartoqarpoq

Coronamut killilersuutit pissutigalugit nuna tamakkerlugu unammersuarnissanut periarfissakippoq. Politikikkut tamatuma eqqumaffigineqarnissaa GIF-ip kissaatigaa.

2021-mi timersuutini assigiinngitsuni GM-ertoqarsinnaanissaa suli qularnartoqarpoq.

Kalaallit Nunaanni timersoqatigiit kattuffiat GIF ileqquusumik tallimanngornermi ataatsimeersuarnerani nalunaarutigineqarpoq. Kattuffiit corona pissutigalugu killilersuutit iluanni unammisitsisinnaanissanik periarfissarsiornissamut oqaloqatiserineqarput.

Katerinnissamut malittarisassat


Inuit amerlanerpaamik 100-it 2021-mi januarip ulluisa 31-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."

- Coronamut malittarisassat ullumikkut atuuttut taamatut isikkoqartillugit aappaagu nuna tamakkerlugu unammersuartoqarsinnaanissaa ilimananngilaq, GIF-mi siulittaasoq Nuka Kleemann KNR-mut oqarpoq.

AAMMA ATUARUK Taekwondomi internettikkut GM: Misigisaq allaavoq

Nalunaaqqaarluni kommunenit assigiinngitsuniit peqataaffigineqarsinnaasunik aaqqissuussinissaq maanna inerteqqutaagallarpoq.

- Killilersuutit allanngortinnissaat qanittumi pisinnaagunanngilaq, Nuka Kleemann oqarpoq.

GIFip ataatsimeersuarnerani tallimanngornermi pisumi kattuffiit GIFmit suleqatigiserineqarput allatut eqqarsarluni timersornermi aaqqissuussisarnissat pillugit.

- Kommuneqarfiit killeqarfiisa iluanni aaqqissuussisoqarsinnaavoq. Kisianni aamma neriuutigaarput inissisimanerput politikkikkut immikkut eqqumaffigineqalissasoq taamalu nuna tamakkerlugu aaqqissuussinissanut periarfissarsiortoqarluni, Nuka Kleemann oqarpoq.

AAMMA ATUARUK Naalakkersuisoq pissartanngorniunnissaq pillugu: KAK-p kissaatai akuerisinnaangilagut

Periarfissat nutaat

Piffissami sivitsortumi nalornisoqareersoq Naalakkersuisut siulittaasuat Kim Kielsen (S) augustimi tusagassiortunik katersortitsinermi nalunaarpoq GM-rtoqarsinnaajunnaartoq.

Arsaattartut kattuffiat KAK aamma assammik arsartartut kattuffiat TAAK allatut periarfissiinikkut pissartanngorniutsitsinissamut neriukkaluarput, tamannali Naalakkersuisunit itigartinneqarpoq.

Nunatsinni nakorsaaneq aamma ilimasaarivoq corona pissutigalugu killilersuinerit 2021-ip ingerlagaatsiarnera ilanngullugu atuunnissaa ilimanartoq naak taakku januarip naaneranut atuukkallaraluartut. Killilersuutit Naalakkersuisunit sivitsoqattaarneqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat