GHF-ip siulittaasua naammagineqanngitsoq

Siulersuisuni assortuuttoqarsimanera Lyberthip ilumuunnginnerarpaa GHF-illu timersoqatigiiffinnit ilaasortaasunit arfinilinnit allakkanik qanittukkut tigusaqarsimanera erseqqissaatigalugu. Allakkani aallartitat immikkut ittumik ataatsimiinnissaannik noqqaassuteqarput, Hans Lyberth naapertorlugu, GHF-ip siulittaasuanut Elise Bruunimut tatiginnikkunnaarnertik pissutigalugu.

GHF-ip taamatut kissaateqarneq, Hans Lyberth naapertorlugu, ataqqisimavaa, aallartitallu immikkut ittumik ataatsimiinnissaat piaarnerpaamik ingerlanneqartussaasimalluni. Maannalu apeqqutigineqarsinnaanngorput ilumut tamanna pisariaqassanersoq, Elise Bruunimmi GHF-ip siulersuisui qimareerpai.

Kalaallit Nunaanni assammik arsarluni timersoqatigiiffiit immikkoortortallu akornanni pissaaniuttoqarneratut sikkoqarpasippoq. Siorna oktobarip qaammataani taamani GHF-imi siulittaasuusoq aamma tatigineqarunnaarpoq, Kalaallit Nunaatalu nunat tamat akornanni assammik arsarnerup silarsuaani inissisimalluarnerata anguneqaqqinnissaa anguniarnagu timersoqatigiiffiit nukitik kattuffiup iluani assortuunnermut atorniarlugit toqqarsimavaat.