GHF aningaasatigut ingerlanerliorpoq

Assammik arsartartut kattuffiat GHF aningaasagissaarnerunngikkaluaqisoq siulersuisut aalajangerput angutit assammik arsartartut Amerikap nunavittaani Pan Amerikami juunimi pissartanngorniuttoqalerpat kalaallit angutit assammik arsartartut peqataatinneqassasut.
maajip 26-at 2008 11:39

Assammik arsartartut kattuffiata siulersuisortaavi apriilip 19-iani ilaasortanngorput. Taakku kattuffiup aningaasaqarnera ilorraap tungaanut saatsinniarlugu ukkulluartussaassavaat, taamalu aamma piareersaanerit aammalu immikkut ittumik ataatsimeersuartitsinissamik aggersaanissaq erseqqissaatigineqarpoq.

Siulersuisunngorlaanit annilaangassutigineqarpoq peqataasinnaanngitsoqariataarnissaa tassami taamaattoqassagaluarpat nunat tamat unammersuarnerannut peqataanissamut pitsaavallaanngitsumik kinguneqarsinnaasoq, taama kattuffiup avammut nalunaaruteqartartua Carl Johan Colberg allappoq.

Angutit assammik arsartartut Pan Amerikami peqataanissaannut aningaasaliissutit ilaatigut ukiumoortumik tapiissutineersuupput taamatuttaaq Team Grønlandiminngaanneersuullutik.

Erseqqissaatigineqarportaaq immikkut ataatsimeersuartitsineq pissasoq aningaasatigut aaqqitassat isikkorissineroriarpata. Tamannalu ilimagineqarpoq juunip naalernerani imaluunniit juulip aallartisimalernerani pissasoq.