18-inik ukiullip Ghazala Khanip ilaqutaasa ikinngutaasalu qulingiluat ilaqutariittut ataqqinassuseq pigiinnarniarlugu toqutsisimasutut Danmarkimi eqqartuussivimmit ullumi pineqaatissiinneqarput.
Toqutaasup angutaa inuunermi sinnera paarnaarussivimmiittussanngortinneqarpoq; ania toqutsisuusoq ukiuni 16-ini, angutit ilaqutaasut marluk aamma ukiuni 16-ini; ukuaa ukiuni 14-ini angullu ilaqutaasoq alla ukiuni qulini paarnaarussivimmuuttussanngortinneqarput.
- Ghazalap angutaa anialu toqutsinermik pilersaarusiortuunertik sivisunerusumik pineqaatissiinneqaatigaat pineqaatissineqartullu sinneri sivikinnerusumik pineqaatissineqarput, Lene Koogi DR-ip ilanngutassiortua Østre Landsret-ip silataanit oqaluttuarpoq.
Taanna aperineqarpoq pineqaatissinneqartut qanoq pineqaatissineqarnertik qisuariarfigisimaneraat imalu akivoq:
- Pineqaatissineqartoq ataasinnaq – tassa taxartartoq ukiuni qulini paarnaarusassanngortitaq kisimi qullilivoq – sinneri sunnguamilluunniit malunnaateqanngillat, Lene Koogi oqarpoq.
Pineqaatissiisoqartorlu suliareqqisoqarnissaanik piumasaqartoqarpoq Højesteretimullu suliaq ingerlateqqinneqarpoq.
Pineqaatissineqartut eqqartuussisuserisuisa taama sivisutigisumik pineqaatissiinerit tupaallaatigaat. Eqqartuussisuserisup Jan Levine-p illersukkani ukiuni 14-ini paarnaarussivimmiittussanngortitaq paarnaarussivimmeereerunilu Danmarkimiit anisinneqartussatut pineqaatissineqartoq pillugu ima oqarpoq:
- Illersugara sivisuallaamik paarnaarussaasussaammat suliareqqitassanngortitsivugut tamannalu Højesteretimi allanngorneqassanersoq utaqqiinnalerparput, Jan Levine oqarpoq.
Suliassanngortitseqqiineq Højesteretimi suliarineqalerpat paarnaarussivimmiititsinissap sivisussusaa nalilersorneqassaaq.
Toqutsisisutulli pineqaatissiissut suliareqqittassanngortinneqarsinnaanngilaq.