GGC soraarsitsinermi eqqunngitsumik iliorpoq, SIK isumaqarpoq
Sulinermut Inuussutissarsiuteqartut Kattuffiata siulittaasua, Jess G. Berthelsen, oqarpoq, Polenimiut isumaqatigiissut malillugu aningaasarsiaqartinneqarsimannginnerat unioqqutitsinerusoq, taamaattumillu sulisitsisuusup Greenland Ground Construction-ip soraarsitsinerminni iliuuserisimasaat suliassanngortinniarlugu pilersaaruteqarlutik:
-Soorunami sumiluunniit sulisitsiniaraanni SIK-ip GA-llu isumaqatigiissutaat aallaavigineqassapput, kisianiinili maani Nuummi ilisimavarput nalunaaquttap akunnermusiaq nalinnginnaasumik 130-140 koruunillu akornanni inissisimasoq; uangali takusinnaasakka naapertorlugit, isumaqatigiissutaallu aallaavigalugu, 120 koruunimik akissarsiaqartussaallutik aningaasarsiaasa allagartaatigut takuneqarsinnaavoq 84 koruuninik akilerneqarsimasut, tamannalu isumaqatigiissummik unioqqutitsineruvoq. Uagulli ilaasortarisimagaluarutsigik soorunami ingerlaannaq kattuffiannut suliassanngortissimassagaluarparput - kattuffiannut tassa GA-mut, unioqqutitsinertullu suliaralugu, Jess G. Berthelsen oqarpoq.
Jess G. Berthelsen periarfissaqarsimavoq inuusuttut Polenimiut soraarsitaasut isumaqatigiissutaannik aningaasarsiarisimasaasalu allagartaannik misissuinissaminut, isumaqarporlu inuusuttut soraarsitaasut eqqunngitsumik pineqarsimasut.
Inuusuttut isumaqatigiissutaanni allaqqavoq soraarsitsisoqassappat ullut 14-init sioqqullugit nalunaarfigineqassasut, kisiannili inuusuttut akissarsiatik annikigalugit naammagittaallioramik ullormiit ullumut soraarsitaapput.
- Tassa tupinnartua, nunaqavissut maaniittut sulisinnaangitsutut eqiasuttuunerararlugit soraarseriarlugit Polenimiunik tikisitsisoqarpoq taavalu taakku aamma suliassaminnik naammassinnissinnaanginnerarlugit soraarsippaat. Isumaqarpunga suliffiutilik GGC taamaalilluni pinngualersoq, aamma soorlulusooq aningaasanik sipaarniarluni taamatut aaqqissuuusseqattaartut, taamaattumik taanna sulisitsisoq ilanngullugu maanna suliassanngortissavarput, Jess G. Berthelsen oqarpoq.
Jess G. Berthelsen aamma oqarpoq Greenland Ground Construction soraarnerussutisiaqartarnermut Polenimiunut akiliisarsimanngimmat ilaasortaaffigisaata Kalaallit Nunaanni Sulisitsisut peqatigiiffiata, GA-p, akiligassanik nassinneqarnissani naatsorsuutigisariaqaraa.
