GG pillugu nassuiaatit tunniunneqarput
Ammerivik Great Greenland pillugu nassuiaatit Naalakkersuisunit suliareqqullugit kissaatigineqartut Great Greenlandimi siulersuisut siulittaasuata Anders Brønsip, apriilip aqqaneq aappaanni tunniussai maanna saqqummiunneqarput. Nassuiaatinik tunniussinermut peqatigitillugu kukkunersiuisut Deloitte aamma Grønlands Revisionskontori immikkut tamarmik nassuiaatinut attuumassuteqartunik nalunaaruteqarput.
Great Greenland pillugu nassuiaateqaqqusineq, ukioq 2007-mi 2009-milu puisit amiinut tapiissutit millisikkiartuaarneqarnissaasa kingunerisinnaasaat pillugu nalilersuisoqarnissaanik Naalakkersuisut kissaateqarnerannik tunngaveqarpoq.
Great Greenlandip puisit amiinut tapiissutaasa millisikkiartuaarneqarnissaat pillugu nassuiaatit aallaavigalugit sipaarniutissat piviusunngortinneqarnissaannut Naalakkersuisut siunnersuummik suliaqarniartut naalakkersuisut siulittaasuat Hans Enoksen nalunaarpoq.
Great Greenlandip siulersuisuini ilaasortaasimasup sulisuusimasullu pasilliutaannut Great Greanlandip pisortai nassuiaammi aamma oqaaseqarput.
Pasilliutigineqartunut akissuteqarnerminni Great Greenlandip siulersuisui allapput pissutsit puttarsillugit paasisaqarfigisatik tassaasut; ammit nunanit allanit pisariaqarnerisa akilersinaassusii, Canadami amersiat nunanut sorlernut nioqqutigineqarnerannut tunngasut, suliarinnittussarsiornermi inatsit malinneqarsimanersoq, suliffeqarfiup pisortaa suliffeqarfiup aningaasaataanik atuilluni imminut illiuliuussimanersoq, Canadami amersiat nunatsinni amersianut unammillertuunersut kiisalu ingerlatseqatigiiffiup siunissami aniguinissaa mianersuunneqarnersoq.
Great Greenlandip tapiissutiminik millisikkiaartortitsinissaa pillugu nassuiaammut Naalakkersuisut inerniliipput, pissutsinik misissuereernermi Great Greenlandip siulersuisuini ulluinnarniluunniit aqutsisuini isornartorsiuinissamut pissutissaqanngitsoq, tamannalu kukkunersiuinermik ingerlatseqatigiiffiit nalunaarutaanni aamma uppernarsaneqartoq, naalakkersuisut allapput.
Great Greenland pillugu misissuinerit Naalakkersuisut taamaasillutik tusaatissatut tigugaat, Naalakkersuisut siulittaasuat Hans Enoksen nalunaarpoq.
Great Greenland pillugu misissuisimanerat itisilerneqarneri Namminersornerullutik Oqartussat nittartagaanni tamakkiisumik atuarneqarsinnaassasut naalakkersuisut aamma nalunaarput.
Atassutip partiianit oqaaseqartitsiniaraluaratta iluatsitsinngilagut.
