GG-mi siulersuisuni ilaasortaasimasoq piumasaqarpoq

Great Greenland-imi misissueqqissaartoqarnissaa siulersuisuni ilaasortaasimasumit maannakkut aamma piumasarineqalerpoq. Allakkallu ammasut Hans Enoksen-imut nassiunneqarsimapput.

Tamatumuuna Great Greenland-imi siulersuisuni ilaasortaasimasoq Jens Immanuelsen allakkanik ammasunik Hans Enoksen-imut allagaqarpoq.

Allakkamini siulersuisut siulittaasuat uparuarpaa, oqarluni Jacob Abelsen-ip allagai ammasut ilumuussappata, siulersuisuni ilaasortat eqqunngitsumik siulittaasumit ilisimatinneqartarsimassasut. Jacob Abelsen ammasumik allagaqarnermini allappoq, Canadamiut puisit amiutaat imminut akilersinnaasimannginneri siulersuisuni ilaasortanut saqqummiunniarsimagaluarini, Great Greenland-imili pisortap isertuussimagai.

Ippassaq Atassummeersoq Augusta Salling, Atassutip partiia sinnerlugu allagaqarnermini kingumut piumasaqaqqippoq, sukumiinerusumik Great Greenland-imi misissuisoqarnissaa piumasaralugu. Taamatut piumasaqarneq aallaaveqarpoq, Great Greenland-imi aningaasaqarnermut pisortaasimasoq Jacob Abelsen, Hans Enoksen-imut ammasumik allagaqareersorlu.

Jens Immanuelsen Hans Enoksen-imut allagaqarnermini oqarpoq, suliffeqarfimmi pisimasut pillugit siulersuisut akisussaatinneqartarmata, piffissami taaneqatuni sutigut allatigut siulittaasoq isertuussaqartarsimanersoq pasiniarlugu, piginnittut sinnerlugit Hans Enoksen misissueqqissaartitsisariaqartoq.

Jens Immanuelsen Upernavimmi Atassut sinnerlugu borgmesteritut qinigaasoq, Atassutip ippassaq piumasarisaa isumaqatigilluinnarlugu misissueqqissaartoqarnissaanik maannakkut piumasaqarpoq.

Jens Immanuelsen Great Greenland-ip siulersuisuini 2003-miit 2005-ip tungaanut ilaasortaasimavoq.