GEUS imminut pigisutut inissisimalertariaqarpoq

Partiit tamarmik Christiansborgimi isumaqatigiissutigaat, Danmarkimi Kalaallit Nunaannilu misissueqqaarnerit, GEUS, imminut pigisutut inissisimalissasoq. Ilisimatusarfiit universitetiata ataanni GEUS ullumikkut inissisimavoq. -GEUS politikikkut attaveerutissaaq, taamaammallu Namminersornerullutik Oqartussat siulersuisuni sinniisoqarnissaat pingaaruteqarluinnarpoq, taakkumi pisortamik qinersisussaapput, GEUS pillugu inatsit nutartigaq Folketingimi ippassaq siullermeerlugu oqaluuserineqarmat, Enhedslistimeersoq Per Clausen taama oqarpoq. KANUKOKA-p tusarniaanerup nalaani siunnersuutigaa siulersuisuni Kalaallit Nunaannit ullumikkut ilaasortaatitaq minnerpaamik ataatsimik ilasariaqartoq, taannalu Namminersornerullutik Oqartussat toqqassagaat. Tamannali avatangiisit pillugit ministerip, Connie Hedegaardip, itigartitsissutigaa. GEUS aqqanilinnik siulersuisuni ullumikkut ilaasortaqarpoq. Pisuussutit uumaatsut pillugit naalakkersuisoqarfimmi pisortaq, Jørn Skov Nielsen, GEUS-ip siulersuisuini nunatsinnit ilaasortaatinneqarpoq. Inatsisissatut siunnersuut avatangiisit aamma pilersaarusiorneq pillugu ataatsimiititaliamut ingerlateqqinneqarpoq, Folketingip ataatsimiinnerani aappassaaneernissaanut suliassanngortinneqarluni.