GEUS-imi ujarassiuup ilisimatusarneq nunatsinni paasiuminarsassagaa
Ujarassiooq kalaaleq Majken Djurhuus Poulsen Danmarkimi Kalaallit Nunaannilu Ujarassiornermik Ilisimatusarfimmi (GEUS) nutaamik akisussaaffittaarpoq.
Nunatsinni ujarassiornermi ilisimatusarnermut immikkut ittumik akisussaasuussaaq ilisimatusartullu innuttaasullu akornanni attaveqarnerulersitsissalluni.
Tamanna saqqummiinikkut, innuttaasunik ataatsimiisitsinikkut nunatsinnilu illoqarfinni anginerni, mikinerni nunaqarfinnilu aaqqissuussinikkut pissaaq.
GEUS tusagassiuutinut nalunaarummi taama allappoq.
- Ujarassiorneq pillugu paasititsiniaaneq nuannareqaara. Inunnik naapitaqartarnerit nuannernerpaat ilagaat – alapernaannerat malugalugu, apeqqutaat tusaallugit aamma arlaannik paasisaqariataarlutik nuannaalertarnerat takullugu, Majken Djurhuus Poulsen tusagassiuutinut nalunaarummi oqarpoq.
- Ujarassiornermut tunngatillugu ilisimatuussutsikkut ilisimasat nunatsinni innuttaasunut paasiuminarnerulersinnissaanut suliassaqarfittaanni periarfissaqalissaanga, ilisimatusartoq oqarpoq.
Illuttut paasititsiniaaneq
Atorfilli GEUS-ip nunatsinni ilisimatusarneranik ingerlatitseqqinnissamut taamaallaat tungassuteqanngilaq.
Najukkamiit apeqqutinik, misilittakkanik isiginnittarfiaatsinillu aamma tusarnaartassaaq paasisanilu ilisimatusarnikkut suleqatigiinnut apuuttassallugit.
- Ilisimasatta oqaluttuarinissaannut tunngassuteqaannanngilaq kisiannili aamma najukkani apeqqutit, isiginnittariaatsit ilisimasallu tusarnaarnissaannut suliatsinnilu atornissaannut tunngassuteqarpoq. Majken tassuuna pingaarutilimmik inissisimaffeqassaaq, Lars Nielsen, GEUS-imi allaffissornermi pisortaq tusagassiuutinut nalunaarummi oqarpoq.
Majken Djurhuus Poulsen nunatsinni ukiorpassuarni misissuisarlunilu ilisimatusartarpoq.
Innuttaasunullu ilisimatusarnikkut aatsaat paasissutissiisalernavianngilaq.
Nunatta ujarai, aatsitassaatai qaqqaalu pillugit ilinniartitsillunilu ilisimasanik atuarfinnik inuusuttunullu ilinniarfinnik ilaatigut suleqateqarnikkut Unnullu Kulturisiorfimmi ingerlatitseqqittareerpoq.
Taamaattumik ujaqqat ilusaat ujarassiornerullu kalaallit piorsarsimassutsikkut kingornussaannut attuumassuteqarnera, itsarnisarsiornermut, eqqumiitsuliornermut pinnersaasiornermullu kiisalu najukkani ujaqqanit pisuussutinik atuineq pillugit oqaluuserinninneq Majken Djurhuus Poulsenimut allanartuunngilaq.
Ilisimatusartuuinnassasoq
Majken Djurhuus Poulsen akisussaaffigilikkami saniatigut ujarassiuutut suliinnarlunilu ilisimatusartuuinnassaaq.
GEUS-imi 2013-imili sulivoq, GEUS-ip Nuummi allaffeqarfiani ukiunilu 12-ini sulilluni.
Majken Djurhuus Poulsen Københavnip Universitetianit geologi-geosciencemi ph.d.-qarpoq nunattalu sananeqaataa, geokemia aatsitassaataalu ilisimatusaatigai, taakkunani geokemimi ilisarnaatit nunallu atortussiaata suminngaanneerneri ukkataralugit.
Kalaallini arnani siullersaalluni ujarassiornermi ph.d.-qarpoq ilinniarninilu 2022-mi maajimi naammassivaa.
Naammassissutissatut Tasiilap eqqaani rubini safiri aappaluartoq misissorlugu allaaseraa.
Akisussaasunngornermini nunatta qanoq pinngorsimanera pillugu qaqqallu assigiinngitsut aatsitassallu, nunatsinnut tunngatillugu qanoq oqaluttuassaqartitsisinnaaneri pillugit ingerlatitseqqiisassaaq.
Taanna aamma nunap sananeqaataanik najukkami pissutsinut, soorlu eqqumiitsuliornermut, pinnersaasiornermut, takornariaqarnermut kulturikkullu kingornussassanut atassusiisinnaasassaaq.
GEUS-ip allaffeqarfissuani Københavnimiittumi allaffeqassaaq akulikitsumilli nunatsinnukartassaaq GEUS-illu Nuummi allaffia qanimut suleqatigisassallugu.
GEUS-imit paasissutissiineq naapertorlugu, paasissutissanik immikkut ittunik paasissutissiinermi oqalutseqartoqarsinnaallunilu nutserisoqarsinnaavoq.
GEUS-ip peqatigiiffiit, ‘suliffeqarfiit sumiiffiilluunniit ujarassiuumik pulaarneqarusukkunik Majken Djurhuus Poulsenip mailianut madp@geus.dk-mut saaffiginnissinnaanerat’, tusagassiuutinut nalunaarummi allappaa.
