Aviisi: GEUS-ikkormiut misissuinermi paasisaminnik naalakkersuisunut anngussisimanerarput
Naalakkersuisut De nationale Geologiske Undersøgelser for Danmark & Grønland (GEUS) isornartorsioraat siusinnerusukkut oqaluttuaraarput. GEUS-ikkormiummi Tunup avannaani kangerluit ilaanni Dickson Fjordimi qaqqamit sisoortoqarnerata kingunerisaanik tassaareernerani misissuinermi paasisanik naalakkersuisunut anngussaqarsimanngitsut tamannalu isornartorsiuinerminnut tunngavilersuutigigitsik, naalakkersuisut oqaatigaat.
Naalakkersuisut misissuinermi paasisanik anngussivigineqarsimanatik isumaqarput. Naalakkersuisullu taama isumaqarnerat ajuusaarutigigitsik, GEUS-ikkormiut KNR-imut tamatuma kingorna allapput.
Naalakkersuisullu taama isumaqarnerisa oqaluttuassartaa takilaannguatsiartoq paasinarsivoq.
GEUS paasissutissiisimasoq
GEUS-ikkormiummi misissuinermi paasisaminnik tusagassiorfinnut nalunaaruteqartinnatik naalakkersuisunut anngussaqarsimanerannik takutitsisunik, Danmarkimi aviisit ilaat Jyllands-Posten allagaataateqarpoq.
Aviisi Jyllands-Posten taama allappoq.
Allagaatinilu taakkunani oqaaseqaatit ilaanni GEUS-imeersumi ilaatigut ima allaqqasoqarpoq:
"Qaqqamit sisoortoqareernerani misissuinermi paasisavut tamanut tusarliutsinnagit Kalaallit Nunaanni oqartussanut anngukkivut, GEUS-imit isumaqarpugut.
Tassa Kalaallit Nunaanni oqartussanut anngussavut naalakkersuisunut ingerlateqqinneqarsimanissaat, GEUS-imit naatsorsuutigaarput."
Taamaaliortoqarsimannginnguatsiarporli.
Naalakkersuisoqarfik aalajangiusimasoq
Tassa misissuinermi paasisat qaqugukkut annaaneqarsimanersut ilisimaneqanngilaq.
Dickson Fjordimi qaqqamit sisoortoqarmat meterit 200-t missaannik portutigisumik tassaarnerata kingunerisaanik nuna ulluni qulingiluani sajussimasoq, misissuinermi kingullermi erserpoq.
Taamaammat “ajunaarnersuaqarsimasinnaaneranik paasisaminnik anngussivigeqqaarnata tamanut tusarliisimanerat isumanerlunnartoq”, naalakkersuisut tusagassiorfinnut nalunaarumminni ilaatigut allapput.
Taamaammat GEUS tamanna pillugu allagaatini oqaaseqaateqarsimagaluartoq naalakkersuisoqarfiup isornartorsiutini aalajangiusimagaa, inuussutissarsiornermut aatsitassanullu naalakkersuisoqarfiup pisortaa Jørgen T. Hammeken-Holm oqarpoq. Taanna Jyllands-Postenimut akissumminni ima allappoq:
- Allaatigisassi qaqugu saqqummersinnissaanik tusagassiorfinnulluunniit qaqugu nalunaaruteqarnissamik ilisimatinneqarnikuunngilagut. Aamma tamatumunnga tunngatillugu mailikkut allatigulluunniit attavigineqarnikuunngilagut.
