Gerth Pîvât Tasiilami sølviusumik Nersornaaserneqarpoq
Siulittaasoqarfiup Gerth Pîvât sølviusumik Nersornaaserpaa piffissami sivisuumi annertuumillu kulturikkut nersortarialimmik Kalaallit Nunaannik sullissisimanera tunngavilersuutigalugu.
Siulittaasup Gerth Pîvâtimut oqaaseqarnermini ilaatigut makku erseqqissarpai:
”Taama piumassutsinnik peqatigiiffilerinermi suliaqarnerit aammalu Ingeratsilermi siuttuusimanikkut tunniussaqarsimanerit immikkut maluginiarneqarsimavoq. Erinarsoqatigiinnut tunngasumik immikkut qujamasuutissaraavut aqaatit ileqqorsuutillu maani Tasiilami eqqaanilu suli eqqaaneqartut puiorneqartussaajunnaarlugit ilinniartitsissutigalugit immiunneqarsimanerat siuttutut peqataaffigisimagakku.
Erinarsuutit pingaartumik ileqqorsuutinik taaneqarsinnaasut Inngeratsilikkut tusarnersumik atortagaat ilaqarput Inuit issittormiut naggueqatigiittut pigisatsigut ataatsimoornitsinnut uppernarsaataasunik.
Qangarsuaanit oqaluttuaatitta ilaat erinnat suluinik qangattaanneqartariaqarmata maani atuisarnissigut tammatsaalisassi ilagaat, uffa uagut nunatta kitaamiut oqaluttuat tamakku erinaat amerlasuutigut puioreersimagivut.
Oqaluttuat erinalerneqarsinnaanerannut assersuutissaqqippoq ”Qaartulummik nerlernillu” oqaluttuaq. Taanna samani samanersuaq Alaskami naggueqatitta pigaat oqaluttuatut, aatsaallu maani erinnersimavarsi, tusarnivissumik.
”Ilippuaata qiliniartsinngaata
hro hrooo
Kiisa merserserpitsivara tikittarpaang”