Gerhardt Petersen (A): Tunuarnera pakatsinarpoq
Siumumi siulittaasoq, Aleqa Hammond, tusagassiuutinut allagaqarluni ilisimatitsivoq, Finn Karlsen Ataasutaajunnaarluni Siumukkormiunngortoq.
Finn Karlsen Siumumut sooq nuukkumanersoq tusagassiuutinut allakkami ersersinneqanngilaq. Finn Karlsen Atassummi ukiorpassuarni siulittaasuuvoq. Siumut-Atassullu naalakkersuisoqatigiikkallarmata Finn Karlsen aalisarnermut naalakkersuisuuvoq.
Finn Karlsenip partiimut allamut nuunnera pillugu tusagassiortunik katersortitsinissamut Siumup siulittaasua, Aleqa Hammond, ullumi nalunaaqutaq marlunut aggersaavoq. Siumup gruppiata Inatsisartuni allaffiani tamanna pissaaq.
Finn Karlsenip partiimut allamut nuunnera Atassutip siulittaasuata pakatsissutigaa:
- Taamannak nammineq aalajangernera soorunami ataqqivarput, kisianni Atassummi pakatsivugut. Atassummimiunimmi tuniliaqutaqarluni qinersiserpassuaqarluni maanna Atassut qimammagu.
Sapaatip akunneri arlaqanngitsut qaangiupput Qeqqata Kommununalbestyrelsiani ilaasortaq, Karl Davidsen Atassummit Siumumut nuummat. Suna Atassutip ajornartorsiutigineraa, Atassutip siulittaasuata Gerhardt Petersenip politikkimut attuumassuteqarsorinngilaa:
- Uanga isumaqanngilanga politikki tunngavigalugu Atassut ajorineqartoq, kisianni inuit iluminni ajornartorsiuteqarnertik aamma ilaatigut siulersuisuunerit nakuuniunneri immaqa pillugit pisimasinnaasartut, Gerhardt Petersen oqarpoq.
Oqaatigisinnaanngilaali sorpiaat peqqutaasinnaasut.
- Soorunami iserfigisinnaanngilakka, kisianni nukipparujunnik atuiffiusimapput, siulersuisullu nutaat politikkiat siunertaallu annerusumik sammerusuppavut, oqarpoq.
Ukiorpassuarni Atassummi siulittaasuusimasup Siumumut nuunnera soorunami tusaanngitsuuginnarsinnaanngikkitsik oqaatigaa.
- Taamaattumik siulersuisuunerni piffissami qanittumi eqqartuisariaqarpugut, Gerhardt Petersen erseqqissaavoq.
2009-mi qinersisoqareernerata kingorna Inatsisartuni ilaasortanik aappassaa partiinit allanit Siumumut nuuttoqarpoq: Akitsinnguaq Olsen Inuit Ataqatigiinniit Siumumut siorna oktobarimi nuuppoq.
Finn Karlsenip partiiminit nuunnera naalakkersuisoqatigiit Inatsisartuni amerlanerussuteqarnerannut allannguuteqartitsissanngilaq.
