Georgiami najummassimanartorsiorput

Sakkutuut Georgiameersut oqarput russit timmisartui marluk nakkartissimallugit, timmisartortartorlu Ruslandimeersoq tigusarineqarsimasoq aamma nalunaarutigineqarluni.

Politikkikkut oqariartuutit aamma sakkortusiartorput.

Georgia Ukrainemiit sakkulersorneqartoq Ruslandip nunanut allanut ministereqarfianit oqaatigineqarpoq, Sydossetiamilu innuttaasunik toqoraasoqartoq Ruslandip ministeriunerata Vladimir Putinip oqaatigaa.

Ruslandip præsidentia Dmitri Medvedev USA-p præsidentianik George W. Bushimik oqaloqatiginnippoq, Georgiamilu akersuunnerit unitsinneqarnissaat siunertaralugu Ruslandip sakkutuujutini angerlartittariaqarai, George W. Buship oqariartuutigaa.

Nunat Baltikumimiittut Estland, Letland aamma Litauen, kiisalu nunat killiit illersoqatigiiffiat NATO Ruslandip iliuuserisai nunasiaateqarniapalaatut nalilerpaat, nunallu EU-miittut, NATO-mi ilaasortat USA-meersullu Georgiami aaqqiagiinngissutit aaqqiiviginiarlugit Georgialiartinneqarnissaat aalajangerneqarpoq.

Danmarkip nunanut allanut ministeriata Per Stig Møllerip Ruslandip iliuuserisai assuarai:

- Pissutsit maanna atuuttut akuersaarneqarsinnaangillat, Ruslandillu Georgiamut nakuusernera maanna unitsinneqartariaqarpoq, Per Stig Møller oqarpoq.

Nunat Georgiamut sakkunik tunisisut akersuunnernut akisussaaqataasut, Ruslandip nunanut allanut ministeriata Sergei Lavrovip oqaatigaa.

Akersuunnerit Georgiamiunit aallarnerneqartoq Sergei Lavrovip oqaatigaa, Ruslandilu Georgiamut sorsukkusunnginnerarlugu.

Georgia Sovjetunioniusimasumut 1991-ip tungaanut ilaasortaagaluarpoq.

Georgiami pisut pissutigalugit Georgiap OL-ertuni peqataatitai angerlartitaassanersut maanna eqqarsaatersuutigineqartoq, OL-imi peqataasut 35-iusut oqaaseqartittagaat oqarpoq.

Georgialli præsidentiata Mikhail Saakashvilip tamanna aalajangertussaagaa, Tuluit nutaarsiassaqartitsiviata Reutersip tusarliuppaa.

Inuit maannamut 2000-it missaat Georgiami akersuunnerni toqutaasimassangatinneqarput.