Georgiami innuttaasut nungusagaasimapput
Angut Georgiami illoqarfiup, Tblisip avannaata kippasinnerusortaani najugalik oqaluttuarpoq illup ataani ulluni tallimani toqqorsimasimalluni, sakkutooqatigiijaallu Ossetiap kujasinnerusortaaneersut Russit qaartartuiniit qunuginerusimallugit. Nunaqarfimmi najugallit tamarmik qimaasimammata, utoqqaat sanngiitsullu kiserngorussimapput. Inuillu qunugisimasaat tassaapput sakkutooqatigiijaat imminnut aquttut Ossetiap kujasinnerusortaaneersut Georgiamut atanatik Ruslandimut atalerusuttut. Angut alla oqaluttuarpoq sakkutooqatigiijaat tikiukkamik tilligariarlutik toqoraalersimasut.
- Maani maanerpiaq Koba assaannatsinnik ilivarput, angut naqqup ataani oqaluttuarpoq, nangillunilu; matu ammaannaraa sakkutooqatigit aallaavaat.
Tblisimiit Ossetiap kujasinnerusortaata tungaanut aqqutaani illut aserortitersimasut takussaapput, naatsiivinnilu ilerrit qanittukkut matoorneqarsimasut inuillu toqungasut timaat pullaattut takuneqarsinnaallutik. Tamakkua tamarmik naggueqatigit nungusagaasimanerannut takussutissaapput. Nunarsuatsinnilu inuit pisinnaatitaaffiinik nakkutiginnittut, Human Rights Watch nalunaarpoq toqoraasimasut Ossetiap kujataaneeraluartut Russit tamaani nakkutiginnillutillu pissaaneqartuummata taakkua akisussaasuutinneqartariaqartut.
