George W. Bush: Qatsussisut paasisinnaalluarpara
- USA-mi innuttaasut sorsunneq qatsutivippaat, tamanna paasisinnaalluarpara, USA-p præsidentia Georg W. Bush, tusagassiortunik katersortitsinermini ullumi taama oqarpoq. Tusagassiortunik katersortitsineq pivoq nalunaarut ulluminutaaq Irakimi sorsuneq pillugu killiffissiuiniarnermik imalik saqqummiunneqareersorlu.
Qanorluunniit amerikamiut sorsunnermik qatsussitigi-galuarpata aammalu qanorluunniit republikanererpassuit demokratillu politikeriisa præsident Bush piumasaqarfigigaluarpassuk sakkutuunik angerlarartitseqqullugu tusagassiortunik katersortitsinermi paasinarsivoq præsidentip maannakkut atuuttut allanngortinnianngikkai.
Danmarks Radio-p ilanngutassiortuata, Jette Bjernumip, USA-mi ilanngutassiortoq Thomas Falbe aperisimavaa, sooq præsident Bushi taama uteriitsiginersoq.
Præsident Bushi siunniussaminut tunngatillugu politikeritut malartitassaanngitsutut uteriitsuujuartuuvoq kukkussutiminillu nassueruteqan-ngisaannartuunera inuttaanut pingaarutilerujussuuvoq.
Tamatigullu aaliangersimarpaluttumik siunniussaqarsimarpaluttumillu siuttutut saqqummertarpoq.
Qanorluunniit polikikkut akillilersorneqartigigaluaraangami illua´tungiliuttunik ilaminillu siunniussani allangortikkumaneq ajorpai.
- Maannakkullu Irakimi sorsunneq pillugu nalunaarusiaq saqqummersoq pillugu tapersersorneqarnersoq Danmarks Radio-mi ilanngutassiortumiit apeqqutigineqarmat USA-mi ilanngutassiortoq akivoq:
Tapersersorneqarlunilu tapersersorneqanngilaq nalunaarusiarli præsidentip illorsuani atorfilittanit politikerinillu atuarneqareerpoq, nalunaarusiamilu eqqaaneqarpoq Irakimi ineriartorneq ilorraap tungaanut saakkiartortoq, kisiannili pissutsit qanorluunniit ittuunerannik oqariartuut asakaluatitsigigaluaraanni annikittualutsigut pingaarutillit taamaallaat siuariarfiusimasut oqaatigineqarpoq.
Allalli pingaaruteqarnerit uuliamik iluanaarutit irakimi innuttaasunut qanoq agguuaaneqarnissaannik pissarsissutaasinnaanerat suli inatsisiliuunneqarsimanngilaq, irakimilu pisuut sakkutuuisa sakkuiarneqarnissaannik suliniutissat sunni muslimillu pisortani sulisorineqalernissai suli tikinneqarsimanngillat, taamaattumillu tassuuna unnersiutissaqartoqanngilaq.
Tullianillu inaarutaasumik Irakimi qullersaatitaalluni oqartussaasup nalilersuinissaa septemberimi pisussaasoq USA-mi ilanngutassiortumit oqaatigineqarpoq. Taamanikkussamullu præsident Bush uteriippallaarunnaarnissaa ilimagineqarpoq, amerikamiullu sakkutuuisa Irakip killeqarfiini taamaallat suliaqalernissaat aammalu Irakimiut sakkutuuinik sungiussaasunngornissaat Al-Qaidakkormiunillu USA-p sakkutuuisa unitsitsiniarnissaat naggataatigullu Irakimi pissutsit irakimiunut ingerlanneqartussanngorlugit tunniunneqarumaarnissaat oqaatigineqarpoq.
