George W. Bush: Korea Avannarleq saassunnavianngilarput

USA-p præsidentiata George W. Buship erseqqissaatigaa Korea Avannarleq USA-mit saassunneqarnavianngitsoq, pisortatigoortumillu oqaloqatigiinnerit aqqutigalugit Korea Avannarleq pillugu aaqqiisoqarnissaa ujartorlugu.

Naalagaaffiit Peqatigiit isumannaallisaaniaqatigiivini Korea Avannarleq pillugu aalajangiisoqarnissaa anguniarlugu aalajangersagassamik USA-mit tunniussisoqarpoq.

Atomip nukinga atorlugu misileraalluni Korea Avannarlermi qaartitsisoqarsimanera aalajangersakkami USA-mit assuarliutigineqarpoq. Franskit nutaarsiassaqartitsivia AFP taama allappoq.

Korea Avannarlermut assartuisarnerit tamarmik misissorneqartalernissaat USA-mit siunnersuutigineqarpoq. Sakkussiat eqqussorneqalernissaat pinngitsoortinniarneqarpoq, sakkussiorsinnaalernissamullu teknologii eqqussorneqannginnissaa aamma anguniarneqarpoq.

Korea Avannarliup nunat arfinillit peqataaffigisaannut isumaqatiginninniarnissanut peqataanissaa kaammattuutigineqarportaaq.