George W. Bush 21.500-nik sakkutuuleeqqiiniarpoq

USA-p Irakkillu akornanni politikki pillugu ulluni sisamani kissaammersimaaqisumik oqallinneqareersorlu Amerikami Innuttaasut sinnerlugit sinniisoqarfimmi amerlanerussuteqartut kissaatigaat præsident George W. Buship sakkutuunik amerlanerusunik Irakimut aallartitsinialersaarnera pillugu isumaqatigiissummik aalajangersaasussamik allakkiortoqarpoq taamaaliornikkut præsidentip iliuusaa assuarisinnaajumallugu.

Isumaqatigiissullu taanna inuit 246-t akornanni 182-t taasissutigisimavaat.

Præsident George W. Buship Irakimiittut sakkutuut 21.500-nik ilaqqinniarsarai.

Taamatuttaaq USA-p nunanut allanut ministeria Condoleezza Rice ilimagineqarani Bagdadimukariataarsimavoq, taassuma takorusussimammagu, Amerikamiut Irakimiullu kattullutik isumannaallisaanissaq anguniarlugu suleqatigiissutigisimasaata qanoq ingerlasimanera.

Condoleeza Rice unnersiorsimavoq takusani tunngavigalugit nunat akornanni isumannaallisaanissaq anguniarlugu suleqatigiinneq aallartilluarsimaqisoq. Erseqqissaatigisimavaali isumannaallisaanissamut suleqatigiinneq aatsaat aallartimmat piffissarlu sivisooq atorlugu ingerlasoqaqqaartussaasoq.