George Bush kia taarsissavaa

USA-mi præsidenti George Bush tunuarpat kinamita præsidentip illorsuaniilissava?

Tamanna eqqarsaatigineqallattaalereerpoq, naak ukiut marluk qaangiuppata aatsaat qinersisoqartussaagaluartoq.

Eqqarsaatigineqartunut ilaavoq Buship nukaa, Jeb Bush. Immaqaluunniit præsidentiusimasup, Bill Clintonip, nulia, Hillary Clinton. New Yorkimili præsidentiusimasoq, Rudolph Giuliani, aamma eqqarsaatersuutigineqarpoq. Taakkuli arlaannaalluunniit qinigassanngortinnissaminik tusarliussaqarsimanngilaq.

Alaskamili senatoriusimasoq taamaaliorniarluni nalunaarsimavoq.

76-inik ukiulik, Mike Gravel, præsidentimut qinigassanngortissamaarluni pisortatigoortumik

ippassaq nalunaarpoq. Amerikami radioqarfiit ilaat taama nalunaarpoq.

Mike Gravel Demokraatit sinnerlugit qinigassanngortinniarpoq. Gravelilli tusaamasaannginnini aamma qineqqusaarnissamut aningaasaatilissuunani nassuerutigaa, isumassarsiarisinnaasassamili tamakku nalimmassarsinnaassagaat isumaqarpoq.

Isumassarsiaanut ilaavoq akileraartarnerup isersitsissutaasarnerata atorunnaarsinneqarnissaa. Aamma politikkikkut sunut pingaaruteqarsinnaasunut innuttaasunik taasisitsisarnerit amerlineqarnissaat Mike Gravelip qineqqusaarutigissamaarpaa.