Georg Stagemi inuusuttut umiartulerput
17-inik ukiulik Nanortalimmeersoq Mikisoq Nielsen, inuusuttuaqqallu sineriammeersut allat tallimat qaammatini tulliuttuni tallimani Europap imartaani umiartortussanngorput, umiarsuarmut tingerlaataannalimmut atuarfiusumullu Georg Stage-mut ilaallutik.
Mikisoq Nielsen-ip nunatsinniillu umiartoqatissaasa tallimat, ilaatigut Skotland, Tuluit Nunaat, Norge Sverigelu qaammatit tallimat ingerlaneranni tikittussaavaat. Umiarsuaq atuarfiutigisoq ilaaffissaat Georg Stage, tingerlaataannarnik ingerlateqartoq ukioq manna ukiunik 120-liivoq, oqaatigineqarporlu nunarsuarmi umiartornermik atuarfiit maanna pisoqaanersarigaat.
Georg Stage ukiumut umiartortuaqqanik 63-inik atuartoqartarpoq, atuartullu amerlanersaat Danmarkimeersuusarput. Danskilli saniatigut nunatsinnit, Savalimmiunit, Norgemit Sverigemit Åland-illu qeqqertaanit Georg Stage aamma atuartoqartarpoq.
Mikisoq Nielsen-ip Nanortalimmeersup umiartoqatissai allat Qaqortumit Maniitsumiit, Nuummit, Kangerlussuarmit Qasigiannguaniillu Georg Stagemut ulluni makkunani aamma ikiartussapput.
