Qulaarpaa Genip immikkuullarissup kalaallit sukkulersittarpai

Aakkut sukkukillinnissaq pinngitsoortinniarlugu naggueqatigiit inuit geni immikkuularissoq inoriartortissimavaat, inernerivaalu ullumikkut kalaallit Type-2-mik sukkulernissaannut qaninnerulersitsisimanera.

1960-ikkuni sukkortoqanngingajalluinnarallarmalli siullermik missuinermiit maannamut naggueqatigiit Inuit Type 2-mik sukkortut amerlerujussuarsimapput. Ullumi assersuutigalugu danskiniit nappaammut marloriaamik qaninneruvugut.

Pualanerulerlutalu aalannginnerulersimanerput nassuiaatissanut ilaapput.

Pitsaasutulli aamma oqaatigissalugu pingaarpoq, tassa utoqqalisinnanerulersimanerput pissutigalugu ima utoqqaatigisaleratta sukkorsinnaanngorluta.

Nerisassat proteineqaqisut

Peqqutaasut pingajuat kingumut qiviarluta nassaarisinnaavarput. Inuimmi qanga sakkortuunik atugaqarput, timaallu naleqqussarsimapput, geninik, tassa timip qanoq ittuussusaanik kinguaanut ingerlatitseqqittartunik, ineriartortitsisimagamik.

Aamma atuaruk Eqiasuppallaarpugut, pualavallaarlutalu

Nerisanik aalisakkaneersunik imarmiunillu miluumasuneersut orsoqaqalutillu proteineqaqisunik, kisianni aamma kulhydratikeqisunik nerisaqarnikkut ilimanarluinnarpoq, aakkut sukkukillisoornissaq qaninnerulersartoq, tamatumanilu naggueqatigiit Inuit geniat nutaaq iluaqutaavoq.

- Ullumikkut aakkut sukkoqarpallaartuulernisssamik navialisinnaanermut naleqqiukkaanni, taamani inuiaqatigiit piniarnermik inuussutissarsiuteqarallarmata sukkukillisoornissaq ulorianarnipilussuuvoq, Marit Eika Jørgensen oqarpoq.

Taanna Københavnimi Steno Diabets Centerimi nakorsaaneruvoq, Syddansk Universitetimilu issittumik peqqinnissamik suliaqartutut professoriulluni.

Inooriaaseq nutaaq, ajornartorsiutit nutaat

Inuiaqatigiillu Europamiutut inuunerulerpata, nerisallu sukkoqarnerulerlutillu allanik kulhydrateqarnerulerpata, geni ajornartorsiutaalissaaq, taanna pissutigalugu aakkut sukkoqarnerulissagatta.

Aamma atuaruk Kalaallit sukkornermik diabetes 2-mik eqqorneqakulanerusut

Tamakkua tamaasa pualanerunermik aalannginerunermillu ilagaanni ima kinguneqassapput:

- Genitigut ajoqusersinnaasuseqarneq inooriatsimik allanngortitsinermik akugaanni kingunerissuaa, kalaallit Type 2-mik sukkulernissaasa qaninnerungaalernera, Marit Eika Jørgensen oqarpoq.

Inuit quliugaangata sukkortarput

Taanna ilisimatuussutsikkut misissuinerminit naliliivoq, type 2-mi sukkortut 15 procentiinut naggueqatigiit Inuit geniat peqqutaasoq.

Siunissami agguaqatigiisillugu inuunertussusissaq aallaavigalugu inuit amerlanerit sukkulersinnaassapput, naak kisitsisit ullumi annertoreeraluaqisut, Marit Eika Jørgensen, Syddansk Universitetimi Issittumi peqqinnermi professori oqarpoq.  

- Innuttaasut amerliartortut maanna 10 procentingajai Type 2-mik sukkorput, ukiut ingerlanerini allanngortoqangaatsiarsimavoq sukkoqalernissamullu aarlerineq annertusingaatsiasimalluni.

Isummersuutit


 

Pages