Genevemi isumaqatigiissut unioqqutinneqartarsimavoq

Saqqummiussami atuarneqarsinnaavoq sakkutuut tigusaasimasut killisiorneqartigatik timikkut nuanniiliortinneqassasut ersititaallutillu. Tuluit sakkutuuisa killisiuinermi ilitsersuutaanni, aviisip The Guardianip pissarsiarisimasaani, tamanna erserpoq.

Aviisip atortut isertuussat saqqumiuppai, killisiuisartunik ilinniartitsinermi ukiuni kingullerni atorneqartarsimasut.

Ilitsersuutit ilaatigut imaqartarsimapput killisiorneqartoq killisiuinnginnermi killisiusisut kanngunarsassagaat, paatsiveerutsillugulu. Ersitinneqassapput, ernumatillugit annilaangatillugillu.

Ilitsersuutit ilagaat tigusat killisiorneqartinnagit mattarlugit atisaajarneqarnissaat. Ilitsersuut alla imaqarpoq tigusat piffissakkut paatsiveerutsinneqassasut, isaasa assernerisigut eqqaminni susoqarnersoq takusinnaanagu.

Ilitsersuummi naqissuserneqarpoq malugisaarutsitsineq inerteqqutaangitsoq, aamma isinik assiineq, siutinillu assiinerit, inassutigineqarlutik, tigusaasimasut eqqaminni susoqarnersoq paasinnginniassammassuk.

The Guardianip inernilerpaa tuluit killisiueriaasiat Genevemi isumaqatigiissummik unioqqutitsinerusoq, tassami sorsunnermi tigusaasimasunik nikanarsaasarnerit inerteqqutaammata.

Tuluit Nunaanni sakkutuut aviisip saqqumiussaa oqaaseqarfigiumanngilaat, ullumikkut misissuiffigineqarmat.